Կառավարությունը 2011 թ. ընթացքում գործատուների կողմից աշխատողի մահվան դեպքում տրված թաղման նպաստի վճարված գումարները փոխհատուցելու համար ՀՀ աշխատանքի և սոցիալական հարցերի նախարարության սոցիալական ապահովության պետական ծառայությանը 2012 թ. պետբյուջեից կհատկացնի 2 մլն 50 հազար դրամ: Որոշումը նախատեսվում է ընդունել վաղը կառավարության նիստում: Յուրաքանչյուրին միանվագ վճարվող թաղման նպաստի գումարը կազմում է 25 հազ. դրամ, փոխհատուցվելու են 82 քաղաքացիների մահվան ծախսերը:
2011 թ. համար այդ ծրագրով նախատեսված գումարը կազմել է 17 մլն 500 հազ. դրամ, իսկ փաստացի ծախսը՝ 7 մլն 692.9 հազ. դրամ: Սոցիալական վճարների հաշվին կատարված այդ ծախսը՝ աշխատող քաղաքացու մահվան դեպքում տրվող թաղման նպաստը, գլխավորապես կատարվում էր ապահովադիրների կողմից տեղերում, և ապա, համապատասխան հաշվետվությունների ներկայացումից հետո, ՊԵԿ-ի կողմից սոցիալական ապահովության պետական ծառայությանը տրամադրված տեղեկանքների հիման վրա փոխհատուցվում հարկային մարմնին:
Անցած տարի փոխհատուցվել է հունվար-սեպտեմբեր ամիսների ծախսերը: 2011 թ. IV եռամսյակի ընթացքում կատարված ծախսերը փոխհատուցվում են 2012թ. հունվար-փետրվար ամիսների ընթացքում, սակայն դա չի արվել 2012 թ. բյուջեում տվյալ ծրագրի բացակայության պատճառով:
