Ավագ սերունդները պետք է որ ամաչեն նրա համար, որ պուտինյան Ռուսաստանի ստախոս ռեժիմին մատչում տրամադրվեց անվերահսկելի իշխանության, իսկ դատական համակարգն այդօրինակ ռեժիմի դեպքում ի վիճակի չէ կայացնել արդարամիտ որոշումներ: Այս մասին, ինչպես տեղեկացնում է «Ռոսբալտը», Times-ի համար գրված հոդվածում գրել է Միխայիլ Խոդորկովսկին: Հոդվածը տեղադրված է նաև նրա կայքէջում:
«Անցած 8 տարում ես բախվել եմ տասնյակ նման իրավիճակների, երբ դատավորներն ուղղակի խոստովանել են, որ ոչինչ չեն կարող անել: Արդարացնող դատավճռի դեպում, որոշում, որը կկայացվի ի հաճուկս վերևի հրամանի, չեղյալ կհամարվի, իսկ մեզ կպատժեն»,- գրել է դատապարտված օլիգարխը:
Խոդորկովսկին նկատում է, որ Ռուսաստանում անարդար կերպով դատվածները չեն ընդունում իրենց մեղքը` ելնելով սեփական արժանապատվության գիտակցումից ու ստանում են երկարատև պատժաչափեր:
«Հիմա, երբ Պուտինը վերադարձել է իշխանության, այդ նույն` սեփական արժանապատվության գիտակցությունն է շատ քաղաքացիների դուրս բերել Մոսկվայի, Սանկտ Պետերբուրգի փողոցներ` բողոքելով ընտրություններում իրենց ձայները գողանալու դեմ: «Հենց այդ պատճառով ցուցարարների առաջին պահանջներից մեկը դարձել է արդար դատական համակարգն ու քաղբանտարկյալների ազատ արձակումը»,- գրում է գործարարը:
«Պուտինյան ռեժիմի գլխավոր գիծը սուտն է՝ վերից վար: Կոռուպցիա, գանձարանաթալանություն, ընդդիմադիր քաղաքական գործիչների հետապնդում: Սրանք բոլորը խորապես բարոյազուրկ իշխանության հետևանքներ են, իշխանություն, որը բացահայտ, երկերեսանի սուտը համարում է կենսաձև»,- հայտարարել է Խոդորկովսկին:
«Մեր մեղքն է, որ նրանց թույլատրել ենք մեզ ստել: Թույլատրել ենք՝ ելնելով անտարբերությունից, սակայն ավելի շատ` վախից: Դա մեր մեղքն է հաջորդ սերունդների առաջ` ցուցարարների ու այլոց առաջ, որոնք բանտերում են: Երիտասարդ սերունդն այլ է, նրանք վախ չունեն, իսկ սեփական արժանապատվության զգացում ունեն»,- համոզված է նա:
