Թուրքական Cihan լրատվական գործակալության փոխանցմամբ՝ Թուրքիայի վարչապետ Ռեջեփ Էրդողանը մեկնաբանել է Ինտերպոլի կողմից Թուրքիայում գտնվող Իրաքի փոխնախագահ Թարիք Հաշիմիի նկատմամբ միջազգային հետախուզում հայտարարելը և նրան ձերբակալելու համար «կարմիր տեղեկագիր» արձակելը.
«Մենք ամեն կերպ աջակցել, աջակցում և շարունակելու ենք աջակցել Հաշիմիին: Հաշիմին Թուրքիայում է գտնվում առողջական խնդիրների պատճառով: Ես վստահ եմ, որ առողջական խնդիրները լուծելուց հետո նա կվերադառնա հայրենիք: Մենք դեմ ենք նրա ձերբակալմանը»:
Հիշեցնենք, որ Իրաքի շիա կառավարությունը՝ Նուրի Ալ-Մալիքիի գլխավորությամբ, սուննի Հաշիմիին մեղադրում է «մահապարտ էսկադրոնների» կազմավորման և քաղաքական հակառակորդների սպանության մեջ: Հաշիմիի և նրա 73 օգնականների ու թիկնապահների դեմ ներկայացված է մոտ 300 մեղադրանք: Ինքը՝ Հաշիմին, հերքում է այդ մեղադրանքները և պնդում է, որ իր դեմ հարուցված գործը քաղաքական դրդապատճառներ ունի:
