ՀԱԿ առաջնորդ Լևոն Տեր-Պետրոսյանը պատգամավորական մանդատը վայր է դնելու: Այս մասին նա քիչ առաջ հայտարարեց Ազատության հրապարակում ՀԱԿ հանրահավաքի ժամանակ: Նրա խոսքով, իր ներկայությունն ԱԺ-ում իմաստ կունենար, եթե ՀԱԿ-ն Աժ-ում միայնակ կամ այլ ուժերի հետ միասին մեծամասնություն կազմեր, կամ ՀՀԿ-ն կորցներ մեծամասնությունը, նաև չի պատշաճում նախկին նախագահներին լինել ԱԺ պատգամավոր:
«Մանդատից հրաժարումը չի նշանակում դադարեցնել քաղաքական պայքարը: Թեև ես լիարժեքորեն կատարել եմ իմ պարտքը ժողովրդի առջև, սակայն չեմ հեռանա, քանի դեռ ՀՀ-ն գտնվում է այսպիսի թշվառ վիճակում: Եթե ՀՀ նորմալ երկիր լիներ, ես հանգիստ կզբաղվեի գիտական աշխատանքով և այգեգործությամբ»,- հայտարարեց Լևոն Տեր-Պետրոսյանը՝ խոստանալով ամեն ինչ անել ՀԱԿ կազմում՝ ՀՀ-ն քոչարյանասերժական ռեժիմից ազատելու համար, և պայքարել այնքան ժամանակ, որքան կներեն իր ֆիզիկական ուժերը և որքան իր ծառայությունը պահանջված կլինի ժողովրդի կողմից:
Լևոն Տեր-Պետրոսյանը տեղեկացրեց, որ ԱԺ-ում ՀԱԿ խորհրդարանական խմբակցությունը իր փոխարեն կղեկավարի Հրանտ Բագրատյանը:
