Եգիպտոսում դատապարտելու են առնվազն 293 ընդդիմադիրների, որոնք 2011 թ. դեկտեմբերին մասնակցել են իշխանությունների դեմ ուղղված բողոքի ակցիաներին: Նրանց մեղադրում են իշխանություններին չենթարկվելու և ապօրինի զենք կրելու մեջ:
Դատապարտյալներին, որոնց մեջ կան 24 անչափահասներ, մեղադրում են նաև գիտական կենտրոնը հրդեհելու մեջ։
2011 թ. դեկտեմբերին ցուցարարները նստացույց էին կազմակերպել եգիպտական կառավարության շենքի մոտ և պահանջում էին զինվորականներից իշխանությունը տալ քաղաքացիական անձանց: Ակցիայի մի քանի օրվան հաջորդեց ոստիկանության և ցուցարարների միջև դաժան բախումը, որի հետևանքով մահացավ 14 մարդ, հարյուրավորները վիրավորվեցին:
Եվս մեկ աղմկահարույց դատական լսում 379 ցուցարարի նկատմամբ տեղի կունենա հուլիսին։ Նրանք մասնակցել են 2011 թ. նոյեմբերի բողոքի ակցիային: Այդ ժամանակվա բախումների արդյունքում մահացել էր 40 մարդ:
ՊՆ-ի շենքի մոտ բողոքի ցույցի դուրս եկած ևս 300 մարդ, ամենայն հավանականությամբ, ռազմական դատարանի առաջ կկանգնի: Նրանց մեղադրում են զինվորականների վրա հարձակվելու մեջ:
