ՀԱԿ համակարգող Լևոն Զուրաբյանը անցած ընտրությունները որակեց որպես համատարած կեղծված: Ըստ նրա՝ ընտրությունների ժամանակ լցոնվել է մոտ 600 հզ. ձայն, որոնցից 500 հզ-ը լցոնվել է ՀՀԿ օգտին, մոտ 50-ական՝ 2 կուսակցություների օգտին, որոնց անունը Զուրաբյանը խոստացավ տալ ուսումնասիրությունից հետո: Նրա բնորոշմամբ՝ Սերժ Սարգսյանի ռեժիմը ՀՀ-ում հաստատել է մի հանցագործ համակարգ և, ինչպես էլ քվեարկի ժողովուրդը, ՀՀԿ-ն կապահովի իր թիվը:
«Սերժ Սարգսյանը զբաղված է սեփական ժողովրդին փչացնելով, հոգին փողով ծախող զոմբիների վերածելով»,- ասաց Լևոն Զուրաբյանը՝ կոչ անելով պատերազմ հայտարարել անբարո, մարդկային ցանկացած արժեք պղծող իշխանություններին, նրանց դեմ կռվել բոլոր ճակատներում՝ փողոցներում և խորհրդարանում, որովհետև եթե նրանք մի քիչ էլ մնան իշխանության, ազգի սերուցքը լքելու է երկիրը:
Միաժամանակ Լ. Զուրաբյանը նշեց, որ հայտարարվում է, թե ԵԱՀԿ զեկույցում ընտրությունները բնութագրվում է իբրև միջազգային չափանիշներին համապատասխան, թերությունները չեն ազդել արդյունքների վրա և այլն, բայց նման եզրակացություններ չկան զեկույցում, ինչը առաջին անգամ է:
Լուսանկարը՝ PanARMENIAN Photo-ի
