Հաստատված կարծիք կա, որ ավելի լավ է գումարներ ծախսել հասարակական վարքի կարգավորման համար, քան հետո ավելի շատ ծախսել բացասական հետևանքների վերացման համար: Իսկ հասարակական վարքի կարգավորման ամենավերջին և ամբողջ աշխարհում իր յուրատեսակ արդյունքն ունեցող մեթոդը սոցիալական գովազդն է` գովազդ, որը, վեր հանելով երկրում արմատացած վտանգավոր սոցիալական խնդիրներն ու առաջարկելով իրավիճակից դուրս գալու լուծումներ, ունակ է օրեցօր ապականվող հասարակական կյանքը հնարավորինս զերծ պահել առավել վտանգավոր հետևանքներից: Աշխարհի բոլոր զարգացած երկրներում սոցիալական գովազդի միջոցով ներկայումս պետական լուրջ քաղաքականություն է տարվում: Միայն ԱՄՆ-ում տարեկան սոցիալական գովազդի 80 հազար հոլովակ է պատրաստվում և հեռարձակվում:
Իսկ ինչո՞ւ ողջ աշխարհում հասարակության առողջացման, կրթման լավագույն միջոց համարվող նույն այդ սոցիալական գովազդն այդպես էլ չի զարգանում Հայաստանում: Մասնագետներն այս պարագայում, բացի առկա ֆինանսական խնդիրներից, այլ հարցեր են նկատում: Ինչպես, օրինակ, այն, որ իրականում կա՛մ մեր պետությունն է թերագնահատում սոցիալական գովազդի ազդեցության ներուժը, կա՛մ էլ հենց գիտակցելով ազդեցության հզորությունը` վախենում է արթնացնել հասարակությանը: «Իրականում խնդիրն այս երկուսից մեկն է, քանի որ հակառակ դեպքում ստիպված ենք մտածել, որ մենք ապրում ենք իդեալական հասարակությունում ու պարզապես վեր հանելու խնդիրներ չունենք… ինչն ուղղակի աբսուրդ է»,- «Առաջին լրատվական»-ի հետ զրույցում այս մասին ասաց Հայաստանի գովազդային խորհրդի նախագահ Արմեն Մարտիրոսյանը: