Բելառուսի նախագահ Ալեքսանդր Լուկաշենկոն հայտարարում է, որ պատրաստ չէ որոշում կայացնել մահապատժի վերաբերյալ մորատորիում մտցնելու համար:
«Խորհրդարանի իրավասության մեջ չէ մորատորիում հայտարարելը, ես երբեք դրան չեմ գնա: Քանի որ ես իմ ժողովրդի ծառան եմ, ես գիտեմ մարդկանց տրամադրությունները»,- ինչպես տեղեկացնում է ITAR-TASS գործակալությունը, հայտարարել է Բելառուսի նախագահը` պատասխանելով այսօր խորհրդարանականների հարցերին:
Նա նկատել է, որ իրեն շատ դժվար են տրվել մահվան 3 դատավճիռները (Մինսկի մետրոյի ահաբեկչության համար մեղադրվածների):
«Երբ ամբողջ աշխարհը ճնշում է գործադրում քեզ վրա ու ինձ էլ ահաբեկիչ է համարում, ես ստիպված եմ որոշում կայացնել: Ինձ դա պե՞տք է: Հարյուր տարի պետք չէ: Բայց չէ որ ես նախագահ եմ, ու ես պետք է ամեն ինչ անեմ արդարացի, ինչպես սա հասարակությունն է պահանջում», – նկատել է Լուկաշենկոն:
Նրա խոսքով` «դա ծանր հարց է, դժվար է հրապարակավ քննարկելը»:
Ընդ որում` նա չի բացառել, որ հնարավոր է, «հասարակությունը մոտ է այն բանին, որ մորատորիում մտցվի կամ չեղյալ հայտարարվի մահապատիժը»:
«Հնարավոր է, եկել է: Այդ ժամանակ մենք որոշում կկայացնենք խորհրդարանի հետ»,- ասել է նա:
