Ընտրությունների օրը մի շարք ընտրատեղամասերում ամենատարբեր բնույթի ընտրախախտումներ են արձանագրվել՝ սկսած քվեատուփերի ու քվեաթերթիկների չկնքումից, անձնագրերում դրվող կնիքի թանաքի ժամանակից շուտ օքսիդացումից, վերջացրած մարդկանց ու մեքենաների կուտակումներով ու կողմնակի անձի ներկայությամբ ընտրություն կատարելու փաստով: Այսօր կայացած մամուլի ասուլիսի ժամանակ այս մասին ասաց տեղական ամենամեծ դիտորդական կազմակերպության` «Ընտրությունը քոնն է» ՀԿ նախագահ Հարություն Համբարձումյանը՝ հավելելով, որ մի ընտրատեղամասում էլ ընտրողը բջջային հեռախոսով նկարել է իր քվեաթերթիկը, իսկ հետո հանձնաժողովի պահանջով ջնջել այն:
Նրա խոսքով` ՀԿ-ն ավելի ուշ հանդես կգա վերջնական զեկույցով՝ ներկայացնելով իր հետընտրական դիտարկումները:
«Այդուհանդերձ, խախտումներ եղել են, սակայն դրանք ընտրությունների արդյունքների վրա չեն ազդել: Սրանք, նախորդների հետ համեմատած, աննախադեպ ընտրություններ էին:
Եթե նախկինում ձայները հաշվելու ժամանակ դիտորդներին փակում էին կողքի սենյակում կամ կարմիր ժապավենով առանձնացնում նրանց գտնելու տեղը, թույլ չէին տալիս նկարահանել ընտրությունների ընթացքը, ապա այժմ իրավիճակն իրոք բարելավվել է»,- ասաց Հարություն Համբարձումյանը:
Ասուլիսի մյուս բանախոս` «Ընտրությունը քոնն է» ՀԿ քարտուղար Հասմիկ Սարգսյանն իր հերթին տեղեկացրեց, որ ընտրությունների ընթացքին հետևել են ՀԿ շուրջ 4 հազար դիտորդներ:
«Մայիսի 6-ի խորհրդարանական ընտրությունների օրն արձանագրել ենք խաղաղ և հավասարակշռված մթնոլորտ՝ գերազանցապես ընտրական ընթացակարգերի պահպանմամբ: Տեղամասերի զգալի մասում ընտրողները հնարավորություն են ունեցել ազատորեն արտահայտելու իրենց կամքը: Հանձնաժողովների անդամները, վստահված անձինք ու դիտորդները ևս հիմնականում ազատորեն իրականացրել են օրենքով վերապահված իրենց գործառույթները:
Քվեարկության ընթացքում տեղամասերի գերակշռող մասում քվեարկության գործընթացն անցկացվել է ազատ, արդար ու թափանցիկ: Քվեաթերթիկները հաշվելու գործընթացում նույնպես օրենքի զգալի խախտումներ չեն արձանագրվել: «Ընտրությունը քոնն է» ՀԿ-ն ընդհանուր առմամբ նախորդ ընտրությունների համեմատ որոշակի առաջընթաց է արձանագրել, ընտրությունների օրվա մթնոլորտը եղել է հանգիստ և անկաշկանդ:
Արձանագրված դրական տեղաշարժի հետ մեկտեղ ՀԿ դիտորդները նկատել են մի շարք անճշտություններ ու խախտումներ՝ կապված տեղամասերից դուրս քարոզչություն անցկացնելու դեպքերի, «բարեգործությունների», տեղամասերում կողմնակի անձանց ներկայության, ընտրողների կամքի վրա ներազդելու և քաշքշուկների հետ»,- ասաց նա:
Ամփոփելով՝ Հասմիկ Սարգսյանը նկատեց, որ թեպետ այս ընտրությունները հեռու էին կատարյալ լինելուց, սակայն ակնհայտ դրական տեղաշարժն անհերքելի է: