Ֆրանսիայի նորընտիր նախագահ սոցիալիստ Ֆրանսուա Օլանդը նոր կառավարության վարչապետին կնշանակի մայիսի 15-ին։ Այս մասին երկուշաբթի օրը հաղորդում է France Press գործակալությունը:
«Դուք վարչապետի անունը կիմանաք մայիսի 15-ին»,- իր շտաբ-գրասենյակից դուրս գալով՝ լրագրողներին հայտարարել է Օլանդը:
Ավելի վաղ Օլանդի քարոզարշավի ղեկավար Պիեռ Մոսկովիսին հայտարարել էր, որ Օլանդը մոտ օրերին մտադիր է զբաղվել միջազգային գործերով և չի զբաղվի կառավարության կազմով:
Սոցիալիստ Օլանդը Ֆրանսիայի նախագահ ընտրվել է նախագահական ընտրությունների երկրորդ փուլում՝ հավաքելով ձայների 51,62 %-ը, այդպիսով շրջանցելով գործող նախագահ Նիկոլա Սարկոզիին, ով հավաքել է ձայների 48,38 %-ը:
Սարկոզին իր իրավասություններն Օլանդին կփոխանցի մայիսի 15-ին:
