Թուրքական Anadolu գործակալության փոխանցմամբ՝ պաշտոնական այցով Սլովենիայում գտնվող Թուրքիայի վարչապետ Ռեջեփ Էրդողանը հանդիպել է այդ երկրի վարչապետ Ջանեզ Ջանսայի հետ, ինչից հետո կազմակերպվել է համատեղ մամուլի ասուլիս:
Դրա ժամանակ Էրդողանն անդրադարձել է ղեկավարման նախագահական համակարգին Թուրքիայի անցում կատարելու խնդրին. «Մենք ձեռնամուխ ենք եղել երկրի նոր Սահմանադրության մշակման աշխատանքներին: Այդ ամենը ժողովրդավարության մաս է:
Դա կարող է ամբողջովին կամ մասամբ լինել նախագահական համակարգ: Այդ ամենը դեռ քննարկվում է: Քննարկումների արդյունքներով, եթե խորհրդարանը համաձայնի նախագահական համակարգին անցում կատարելուն, ապա մենք ոչ մի կերպ չենք կարող առարկել դրան»:
Միևնույն ժամանակ Թուրքիայի փոխվարչապետ Բեքիր Բոզդաղը պաշտպանել է նախագահական համակարգին անցում կատարելը՝ դա կամ դրա նման մոդելը Թուրքիայի համար համարելով անհրաժեշտ և ընդգծելով, որ Թուրքիայում գործածվող համակարգը չի համապատասխանում ղեկավարման խորհրդարանական համակարգին: