Ադրբեջանական Trend լրատվական գործակալության փոխանցմամբ՝ Ադրբեջանի նախագահ Իլհամ Ալիևն այսօր շնորհավորական ուղերձ է հղել Ֆրանսիայի նորընտիր նախագահ Ֆրանսուա Օլանդին: Իր նամակում Ալիևը նշել է.
«Մենք հատուկ ուշադրություն ենք հատկացնում Ադրբեջանի ու Ֆրանսիայի միջև ավանդական բարեկամական հարաբերությունների ու համագործակցության զարգացմանը: Գոհացնում են միջպետական հարաբերությունների ներկայիս բարձր մակարդակը, քաղաքական, տնտեսական ու հումանիտար ոլորտներում արդյունավետ համագործակցությունը:
Մեծ է ԵԱՀԿ Մինսկի խմբի համանախագահ Ֆրանսիայի դերը Ղարաբաղյան հակամարտության՝ միջազգային իրավական նորմերի շրջանակներում արագ ու արդար, խաղաղ ճանապարհով կարգավորվելու հարցում: Ղարաբաղյան հակամարտությունը մեր ամենացավոտ հարցն է: Մենք հուսով ենք, որ Ֆրանսիան կուժեղացնի խաղաղության գործընթացում իր ջանքերը»: