Грузия Online-ի փոխանցմամբ՝ գիշերը Թբիլիսիում փլվել է երկհարկանի շենք: Այս մասին հայտնել է Թբիլիսիի արտակարգ իրավիճակների գործակալությունը:
Վերջինիս հաղորդմամբ՝ փլուզման ժամանակ շենքում են գտնվել մի քանի ընտանիքներ, սակայն նրանցից ոչ մեկն էլ չի տուժել: Շենքի բնակիչները հայտարարել են, որ այն բանից հետո, ինչ շենքը սկսել է փլվել, իրենք ստիպված են եղել նետվել շենքի պատուհաններից ու պատշգամբներից:
Շենքից փախուստի դիմելու ժամանակ նրանցից ոչ մեկկը չի տուժել, սակայն դրա հետ մեկտեղ նրանք չեն հասցրել շենքից դուրս բերել իրենց կենցաղային տեխնիկան ու կահույքը, որոնց մեծ մասը տուժել է փլուզումից:
Փրկարարների խոսքերով՝ փլուզման պատճառը շենքի վթարային վիճակն է: Վերջին օրերին Թբիլիսիում գրանցված տեղատարափ անձրևները ավելի են վնասել այն և, ի վերջո, հանգեցրել փլուզման: Թբիլիսիի քաղաքապետարանը փլուզված շենքի բնակիչներին տեղավորել է այլ բնակարաններում, իսկ ավելի ուշ կկողմնորոշվի շենքի վերականգնման նպատակահարմարության հարցում:
