Ինչպես գրում է Daily Mail-ը, Սվազիլենդի թագավոր Մսվաթի III-ի 13 կանանցից մեկը լքել է թագավորական հարեմը՝ ամուսնու կողմից ֆիզիկական և հոգեբանական ճնշումների ենթարկվելու պատճառով:
44-ամյա Անգելա Դլամինին թագավորի 6-րդ կինն էր: Նա իր հարազատներին հայտնել է, որ թագավորական հարեմում տառապանքի տարիներ է անցկացրել: Նրան տեսել են ճամպրուկներով հեռանալիս: Նա ուղևորվել է Սվազիլենդի Հոհո շրջանում գտնվող հայրական տուն: Թագավորի հետ ամուսնությունից նա 9-ամյա որդի ունի:
Թագավորը հայտնի է իր կանանց դաստիարակելու կոշտ միջոցներով: 2011-ի նոյեմբերին նա 12-րդ կնոջը՝ 23-ամյա Նոթանդո Դյուբին ոտքով հարվածներ է հասցրել՝ Արդարադատության նախարարի հետ իրեն խաբելու համար: Այնուհետև կինը ստիպված է եղել 1 տարի փակի տակ անցկացնել:
Ժողովրդավարության համար պայքարող ակտիվիստները մշտապես քննադատում են միապետի գործողությունները:
Նշենք, որ հարավաֆրիկյան երկիրը Բրիտանիայից անկախացել է 1968 թվականին: 1973-ին ընդունված սահմանադրությամբ՝ Մսվաթին անձամբ է նշանակում իր կառավարությունը, իսկ ընդդիմադիր ուժերն այնտեղ արգելված են:
Նրա ենթականերն ապրում են օրական մեկ դոլար եկամուտով, մինչդեռ նա շռայլ կյանք է վարում: Ամենահարուստ միապետերի Forbs-ի ցուցակում Մսվաթի III-ը 15-րդ է: Նրա կարողությունը կազմում է 100 մլն դոլար:
