Ոստիկանության հայտարարությունը, համաձայն որի՝ թիվ 12 ընտրատարածքում պատգամավորության թեկնածու առաջադրված Գոհար Վեզիրյանի՝ Խաղաղ Դոնի 1 շենքի մոտ գտնվող բաստուրմայի արտադրամասում մեծ ծավալներով ընտրակաշառք բաժանելու մասին ահազանգն իրականությանը չի համապատասխանում, այդ մարմնի անաչառ աշխատանքի առնչությամբ թեկնածուի մոտ լուրջ կասկածներ է առաջացրել:
Այս մասին «Առաջին լրատվական»-ի հետ զրույցում ասաց ինքը՝ Գոհար Վեզիրյանը՝ հավելելով, որ ոստիկանությունը հայտարարությունը խիստ հապշտապ էր արել, և կես ժամում ուղղակի անհնար էր ճշտել՝ եղե՞լ է իր հայտնած միջադեպի նման դեպք, թե՝ ոչ:
«Ոստիկանությունը պետք է հետաքննություն իրականացներ, ինչը չի արվել: Ես ենթադրություն ունեմ, որ ոստիկանությունն ուղղակի կոալիցիայի մեջ է թաղի այն տղաների հետ, որոնց վրա է դրված ընտրակաշառք բաժանելու «ծանր առաքելությունը»: Ոստիկանությունը նույն այդ տեղից մարդ է բերման ենթարկել, բայց նա կես ժամ անց ազատ է արձակվել: Ես այս ամենում միտում եմ տեսնում: Ոստիկանությունը կոծկում է ընտրակաշառքների բոլոր փաստերը, իսկ մինչ այդ իմ հաղորդումը լսելով՝ ոստիկանները տխուր հայացքով ինձ հուսադրում էին, որ իմ հաղորդմանն անպայման ընթացք է տրվելու, և մեղավորները պատժվելու են»,- ասաց Գոհար Վեզիրյանը:
Ամփոփելով՝ պատգամավորության թեկնածուն նշեց, որ ոստիկանությունում իրեն ասել են. եթե ահազանգողը կաշառք տվողը կամ վերցնողը չէ, մնացած բոլոր դեպքերում ահազանգի մասին խոսք լինել չի կարող: «Ոստիկանությունում փորձում էին բացատրել, որ այս դրույթը սահմանված է ՀՀ Քրեական օրենսգրքով: Մենք, իհարկե, փորձեցինք ասել, որ չի կարելի օրենքը սեփական գիտելիքների իմացության չափով մեկնաբանել, սակայն՝ ապարդյուն»,- ասաց Վեզիրյանը:
Հիշեցնենք, որ ավելի վաղ թիվ 12 ընտրատարածքում պատգամավորության թեկնածուն «Առաջին լրատվական»-ի հետ զրույցում հայտարարել էր, որ Խաղաղ Դոնի 1 շենքի մոտ գտնվող բաստուրմայի արտադրամասում մեծ ծավալներով ընտրակաշառք է բաժանվում: Հանցագործները, սակայն, դուռը կողպել են ներսից և իրավապահների ժամանելուն պես փախուստի դիմել հետնամուտքից: Նրանցից մեկը չէր հասցրել փախչել և բերման էր ենթարկվել: