Ինչպես գրում է The Telegraph-ը, մարզահագուստի ամերիկյան հայտնի արտադրողն ԱՄՆ-ի ամենաբարձրահասակ բնակչի համար մի զույգ հսկա կոշիկ կկարի:
Մինեսոտա նահանգի Մինեապոլիս քաղաքի բնակիչ, ծագումով ուկրաինացի 29-ամյա Իգոր Վովկովինսկի հասակը 2,34 մետր է: Նա անձամբ է այցելել ընկերության` Մասաչուսեթսի Կենտոն քաղաքում գտնվող կենտրոնակայան: Մի խումբ աշխատակիցները չափել են հսկայի ոտքի թաթն ու գծանշումներ կատարել, որպեսզի համապատասխան կոշիկ կարեն: Վովկովինսկիի խոսքերով` իր կոշիկի չափսը 54-58–ն է:
Վերջին 6 տարում նա ենթարկվել է ոտքերի 16 վիրահատության` վերացնելու փոքր չափսի կոշիկների հետևանքները: Իգորը հույս ունի, որ նոր կոշիկների շնորհիվ կկարողանա հանգիստ քայլել փողոցում և կդադարի տանը «բանտարկյալ» լինելուց:
Ընկերության մասնագետների գնահատականով` վերը նշված չափսի կոշիկ կարելու համար 12-20 հազար դոլար կպահանջվի, ինչը պատվիրատուին կտրվի անվճար, չնայած Իգորն արդեն 16 հազար դոլար է հավաքել ինտերնետ-արշավի միջոցով, որին մասնակցել են նաև սոցիալական ցանցերը: Կոշիկը պատրաստ կլինի 6 շաբաթից:
