«ՀՀ-ն հաշմանդամ անձանց կոնվենցիան ընդունել է 2008 թվականին, որն օրենքի ուժ է ստացել 2010 թվականից: Այն պետությունները, որոնք ընդունել են այդ կոնվենցիան պարտավորվում են հաշմանդամների համար ստեղծել հավասար պայմաններ, որ հաշմանդամները դառնան հասարակության լիիրավ անդամ»,- այս մասին լրագրողների հետ հանդիպմանն ասաց Հայաստանի հաշմանդամների «Փյունիկ» միություն ՀԿ ծրագրերի ղեկավար Ռուզան Սարգսյանը:
Ըստ նրա՝ հաշմանդամների իրավունքները մեր երկրում օրենքով պաշտպանված են, բայց այդ օրենքները գործում են, թե ոչ՝ դա արդեն հարց է. «Պետության կողմից քայլեր արվում են: Պետությունը համագործակցում է ՀԿ-ների հետ և ջանքեր թափում, որ օգնի հաշմանդամ անձանց լինել հասարակության լիիրավ անդամներ: Հաշմանդամի վիճակով է որոշվում տվյալ պետության զարգացվածության մակարդակը: Որքան շատ է ուշադրություն դարձվում հաշմանդամների հարցերին, այնքան բարձր է այդ պետության զարգացվածության աստիճանը»:
Սարգսյանը փաստեց, որ մեր պաշտոնյաները սկսել են ավելի շատ մտածել հաշմանդամների մասին. «Պետության կողմից մշակվել է օրենք: Գործատուներին տրվում է արտոնություն, որ հաշմանդամներին ընդունեն աշխատանքի, բայց, ցավոք, շատերը չգիտեն դրա մասին: Կան մի քանի գործատուներ, ովքեր աշխատանք են տրամադրում հաշմանդամներին: Շարժ կա, իհարկե՝ խոշոր չէ, բայց գործընթացն արդեն սկսվել է»:
Սարգսյանը կարծում է, որ հաշմանդամների ուժը հսկայական պոտենցիալ է, և մենք պետք է հնարավորություն տանք նրանց օգտագործել այդ պոտենցիալը. «Հասարակությունը պետք է պատրաստ լինի հաշմանդամներին համարել հասարակության լիիրավ անդամ: Պետության կողմից հաշմանդամները ստանում են հատուկ թոշակ, բայց պետք է հաշմանդամների մասին անընդհատ խոսվի, այլ ոչ թե միայն հատուկ օրերին»:
