Associated Press գործակալությունը պաշտոնապես ներողություն է խնդրել իր թղթակից Էդվարդ Քենեդիին աշխատանքից ազատելու համար, որը 1945թ. առաջինն է հայտարարել Երկրորդ համաշխարհային պատերազմում Գերմանիայի կապիտուլյացիայի մասին:
Էդվարդ Քենեդին այն 17 միջազգային թղթակիցներից էր, որն ականատես էր եղել, թե ինչպես էր մայիսի 7-ի գիշերը Ռեյմսում գեներալ Ալֆրես Յոդլը ստորագրել Երկրորդ համաշխարհային պատերազմում Գերմանիայի անվերապահ կապիտուլյացիայի մասին:
Լրագրողներին թույլատրել էին ներկա գտնվել միայն պայմանով, որ նրանք չեն հրապարակի լուրը մինչև դաշնակից ուժերի ռազմական հրամանատարության կողմից համապատասխան թույլտվությունը:
Այնուհետև արգելքը երկարացվել էր 36 ժամով` մինչև մայիսի 8-ը` ժ. 15:00-ն:
Սակայն մայիսի 7-ի ցերեկը գերմանական հրամանատարությունը հայտարարեց կապիտուլյացիայի մասին ռադիոյով: Ինչպես Քենեդին հետագայում գրել է իր հուշերում, իրեն չի հաջողվել ստանալ լուրն ԱՄն-ում հրապարակելու թույլտվություն, ու ինքն այդ ժամանակ լուրը փոխանցել է AP-ի լոնդոնյան բյուրո` խմբագիրներին չհայտնելով հրապարակման վրա գոյություն ունեցող արգելքի մասին: Նորությունը AP-ի հեռագրերում հայտնվել էր մի քանի րոպե անց: Հրամանատարությունը գործակալությանը ժամանակավորապես արգելել էր լուրեր թողարկել Արևմտյան ճակատից:
Associated Press-ի մրցակիցներն ավելի ուշ հանդես եկան գործակալության հասցեին խիստ քննադատությամբ: Մայիսի 10-ին AP-ն հրապարակեց ներողություն` Գերմանիայի կապիտուլյացիայի մասին լուրի համար ու տեղեկացրեց, որ լուրի վրա գոյություն ունեցող արգելքի մասին իմացել է ուշ: Քենեդին հրապարակավ դատապարտվեց լրագրողական սկզբունքներին դավաճանելու համար, ապա նա հեռացվեց աշխատանքից:
Քենեդին այդ պատմությունը պատմել էր վերջերս հրապարակված իր հուշագրության մեջ. «Էդ. Քենեդու պատերազմը. Հաղթանակի օրը Եվրոպայում, գրաքննությունը և Associated Press-ը» գրքում: Նա մահացել է 1963թ. 58 տարեկանում:
Associated Press-ի ղեկավար Թոմ Քերլին հրապարակավ ներողություն խնդրելով` հայտարարեց, որ իր ժամանակին Քենեդին ճիշտ է վարվել, ու երբ պատերազմը ավարտվում է, այդ մասին տեղեկությունը պետք չէ թաքցնել: Նա Քենեդուն աշխատանքից ազատելը համարել էր «մեծ ողբերգություն»:
