Անցյալ շաբաթ Եգիպտոսից հետ կանչված Սաուդյան Արաբիայի դեսպան Ահմադ Աբդել Ազիզ Ալ-Կատտանն առաջիկա 48 ժամվա ընթացքում կվերադառնա իր պարտականությունների կատարմանը: Այս մասին, ինչպես հաղորդում է ITAR-TASS-ը, այսօր Էր-Ռիյադում Եգիպտոսի խորհրդարանականների պատվիրակության հետ հանդիպման ժամանակ հայտարարել է Սաուդյան Արաբիայի թագավոր Աբդալլահ իբն Աբդել Ազիզ Ալ-Սաուդը:
Հիշեցնենք, որ ապրիլի 28-ին Սաուդյան Արաբիան հայտարարել էր, որ «խորհրդակցության նպատակով» հետ է կանչում Կահիրեից իր դեսպանին և փակում է Ալեքսանդրիա և Սուեզ քաղաքների իր հյուպատոսությունները «մինչև հատուկ կարգադրություն»: Սաուդյան Արաբիայի ղեկավարության այս որոշումը պայմանավորված էր իր դիվանագիտական ներկայացուցչության մոտ տեղի ունեցած բողոքի ակցիաներով: Ավելի վաղ հարյուրավոր եգիպտացիներ Սաուդյան դիվանագիտական հաստատության շենքի մոտ ակցիա էին կազմակերպել՝ պահանջելով ազատ արձակել եգիպտացի իրավապաշտպան Ահմադ Ալ-Ղիզաուիին, որը, ըստ եգիպտացիների, Սաուդյան Արաբիայում ձերբակալվել է սաուդյան միապետին վիրավորելու համար: Իրենց հերթին, սաուդյան իշխանությունները հայտարարում են, որ Ալ-Ղիզաուին ձերբակալվել է Ջիդդա քաղաքի օդանավակայանում, քանի որ նրա մոտ թմրանյութի խմբաքանակ է հայտնաբերվել:
