Ֆրանսիայի դատարանը 5 տարվա ազատազրկման է դատապարտել ալժիրյան ծագման ֆրանսիացի ֆիզիկոս Ադլեն Իշորին: Ինչպես հաղորդում է Le Figaro թերթը, դատարանը Միջուկային հետազոտությունների Եվրոպական կենտրոնի աշխատակից Մեծ հադրոնային բախիչի վրա աշխատած գիտնականին մեղավոր է ճանաչել «Ալ-Կաիդա» միջազգային ահաբեկչական ցանցի հյուսիսաֆրիկյան մասնաճյուղի հետ կապեր ունենալու մեջ: Բացի այդ, Իշորը մեղավոր է ճանաչվել մի շարք ահաբեկչությունների նպատակով դավադրությունների մեջ:
Ադլեն Իշորը ձերբակալվել է 2009 թ. հոկտեմբերին ««Ալ-Կաիդան» իսլամական Մաղրիբում» կազմակերպության հետ կապեր ունենալու մեղադրանքով: Ձերբակալությունից շատ չանցած՝ հայտարարվել է, որ Իշորը մի քանի ահաբեկչություններ է նախապատրաստել, այդ թվում՝ մահափորձ Ֆրանսիայի նախագահ Նիկոլա Սարկոզիի դեմ:
Հետաքննությունը գիտնականին մեղադրել է «Ալ-Կաիդա»–ի անդամների հետ նամակագրական կապ ունենալու մեջ: Պարզվել է, որ անգամ նամակներից մեկում նա համաձայնել է մտնել Ֆրանսիայում ահաբեկչական խմբավորման բջջի մեջ: Դատարաում Իշորը խոստովանել է, որ այդ նամակը գրվել է իր կողմից, սակայն հրաժարվել է իրեն մեղավոր ճանաչել ահաբեկչության մեջ: Նրա խոսքերով՝ ահաբեկիչների հետ նամակագրություն է հաստատել, քանի որ «գտնվում էր ծանր հոգեբանական և ֆիզիկական վիճակում»:
Մեղադրող կողմը Ադլեն Իշորի համար պահանջել է 6 տարվա ազատազրկում: Փաստաբաններն իրենց հերթին պահանջել են ազատ արձակել իրենց պաշտպանյալին, քանի որ նա երբեք անձամբ չի հանդիպել ահաբեկիչների հետ: Բացի այդ, պաշտպանները փորձել են համոզել դատարանին, որ Իշորի մեղքն ապացուցող փաստերը հետաքննությունը ձեռք է բերել անօրինական ճանապարհով:
Արդյունքում ֆիզիկոսը դատապարվել է պայմանական 5 տարվա ազատազրկման: Մինչ դատավճիռի կայացումն Իշորն արդեն ազատազրկման մեջ անցկացրել է 2.5 տարի:
