Ֆրանսիայի դատախազությունն սկսել է քննել վկաների ցուցմունքները՝ կապված Վաշինգտոնում կազմակերպված խրախճանքներից մեկի ժամանակ խմբակային բռնաբարության մեջ Արժույթի միջազգային հիմնադրամի նախկին ղեկավար Դոմինկ Ստրոս Կանի մասնակցության հետ:
Ինչպես հաղորդում է Agence France-Presse-ը, գերատեսչության ներկայացուցիչների խոսքերով՝ իրենց մոտ Ստրոս Կանի մասնակցությունն ապացուցող նոր փաստեր կան, ուստի հետաքննությունը կշարունակվի:
Խոսքը բելգիացի մի մարմնավաճառուհու վկայության մասին է, ըստ որի՝ 2010 թ. դեկտեմբերին իրեն բռնությամբ ստիպել են սեքսով զբաղվել խրախճանքներից մեկի ժամանակ, որին ներկա են եղել ԱՄՀ նախկին տնօրենը և նրա ընկերները:
Մարմնավաճառուհու գործընկերուհին մասամբ հաստատել է նրա ցուցմունքը, սակայն նրանցից ոչ մեկ դեռ չի պատրաստվում դատարան դիմել այդ հարցով:
Ավելի վաղ Ստրոս Կանը խոստովանել էր, որ ԱՄՀ-ն ղեկավարելու տարիներին ակտիվ սեռական կյանքով է ապրել, սակայն կտրականապես հերքել էր, որ մասնակցել է բռնաբարությունների:
2012 թ. մարտին նրան մեղադրանք էր ներկայացվել կավատության համար, սակայն դա նա նույնպես հերքել էր՝ հայտարարելով, որ երբեք չի կասկածել, որ իր հետ սեքսով զբաղվող կանայք մարմնավաճառներ են:
Մինչ այդ՝ 2011 թ. մայիսին, Սրտրոս Կանը ձերբակալվել էր Նյու Յորքի օդանավակայանում, քանի որ կասկածվում էր հյուրանոցի սպասուհու նկատմամբ սեռական ոտնձգության մեջ: Ավելի ուշ, սակայն, նրան ազատ արձակեցին ոչ բավարար ապացույցների պատճառով:
