Մայիսի 4-ին կայացել է արտգործնախարար Էդվարդ Նալբանդյանի և պաշտոնական այցելությամբ Երևան ժամանած Ուրուգվայի արտաքին գործերի նախարար Լուիս Ալմագրոյի հանդիպումը: Այս մասին «Առաջին լրատվական»-ին հայտնում են ՀՀ ԱԳՆ մամլո գրասենյակից:
Ողջունելով հյուրին՝ նախարար Նալբանդյանն ասել է. «Հայաստանը և Ուրուգվայը գտնվում են հազարավոր կիլոմետրեր հեռավորության վրա, բայց Ուրուգվայը Հայաստանի և հայ ժողովրդի համար շատ մոտ և բարեկամական երկիր է: Ուրուգվայը առաջին երկիրն էր, որը դեռ 1965թ. ճանաչեց Հայոց Ցեղասպանությունը և պատահական չէ, որ իր պաշտոնական այցելությունը Հայաստան սկսեցիք հենց Ցեղասպանության հուշահամալիր այցելությամբ: Մենք շատ շնորհակալ ենք Ուրուգվայի ժողովրդին, Ուրուգվայի ղեկավարությանը, որ բացել են իրենց դռները, ընդունել են ցեղասպանությունից մազապուրծ եղած մեր հայրենակիցներին, և հազարավոր հայեր են ապրում Ուրուգվայում, որոնց համար այդ երկիրը երկրորդ հայրենիք է դարձել: Մեզ կապում են բավական սերտ և ջերմ հարաբերություններ»:
Շնորհակալություն հայտնելով ընդունելության համար, Լուիս Ալմագրոն ընդգծել է, որ Ուրուգվայում ամենաջերմ զգացմունքներն են տածում հայ ժողովրդի և Հայաստանի հանդեպ, ինչի վկայությունն է բազմահազարանոց հայկական համայնքի դերակատարությունը իր երկրի կյանքում, և ամուր միջպետական հարաբերությունները Հայաստանի հետ:
Հանդիպմանը հանգամանալից քննարկում է տեղի ունեցել երկկողմ հարաբերությունները առավել զարգացնելու ուղիների, տարածաշրջանային և միջազգային օրակարգի խնդիրների շուրջ:
Նախարարները պայմանավորվել են հավելյալ ջանքեր գործադրել քաղաքական երկխոսությունը, միջազգային կազմակերպություններում համագործակցությունը ամրապնդելու, առևտրատնտեսական հարաբերությունները խթանելու, իրավապայմանագրային դաշտն ընդլայնելու նպատակով:
Էդվարդ Նալբանդյանի ու Լուիս Ալմագրոյի բանակցությունների օրակարգում էր արցախյան հիմնախնդրի կարգավորման գործընթացը: Այս առումով երկուստեք շեշտվել է, որ միջնորդների կողմից ներկայացված առաջարկությունների հիման վրա հիմնախնդրի խաղաղ կարգավորումն այլընտրանք չունի:
Նախարարի հանդիպմանը հետևել է համատեղ մամուլի ասուլիս:
