Հարվարդի համալսարանի և Մասսաչուսեթսի տեխնոլոգիական ինստիտուտի ներկայացուցիչները մայիսի 2-ին Քեմբրիջում տեղի ունեցած մամլո ասուլիսին հայտարարել են օնլայն կրթության հեռակա ուսուցման edX համատեղ նախագծի գործարկման մասին:
Այդ մասին նշված է ուսումնական հաստատությունների պաշտոնական կայքէջերում:
Բուհերի ներկայացուցիչների խոսքով` իրենք պատրաստվում են «հեղափոխություն կատարել ուսումնական գործընթացում»` այն դարձնելով ազատ, անվճար, որակյալ ու առավելագույնս մատչելի:
Նախագծի օնլայն կրթության գաղափարախոսություն ասելով՝ պետք է հասկանալ ոչ միայն դասախոսությունների տեսակուրսերը, այլև հեռակա ուսուցման ամբողջական համակարգ, որը ներառում է թեստեր, շփում խմբերում ու դասախոսի կողմից խիստ հսկողություն: Դրա համար edX-ի հեղինակները պատրաստվում են ստեղծել հատուկ ծրագրային ապահովման համակարգ, որը թույլ կտա ղեկավարել ոչ միայն դասավանդման գործընթացը, այլև կվերլուծի ուսանողների վարքագիծը:
edX-ի ստեղծողների խոսքերով` իրենց համար հիմնական առաջնահերթությունը սովորական կրթության որակի բարձրացումն է: Նախագիծը առաջին հերթին կրում է փորձնական բնույթ: edX-ի զարգացման համար համալսարաններից յուրաքանչյուրը հատկացրել է 30 միլիոն դոլար: Ստեղծողները մտադիր են ընդլայնել գործընկերների թիվն ու դրանում ներգրավել այլ ուսումնական հաստատությունների:
Նախագիծը նպատակ ունի ներգրավել մինչև 1 միլիարդ ուսանող ամբողջ աշխարհից: edX-ի կրթությունը կլինի անվճար: