CNN Türk-ի փոխանցմամբ՝ ԱՄՆ նախագահ Ջիմմի Քարտերի՝ ազգային անվտանգության հարցերով խորհրդական Զբիգնեւ Բժեզինսկին Վաշինգտոնում Բրուքինգսի ինստիտուտի կողմից կազմակերպված միջազգային կոնֆերանսի ժամանակ հանդես է եկել «Արևմուտքն ու Թուրքիան. դերը գլոբալ լայն ճարտարապետության ձևավորման մեջ » խորագրով զեկույցով:
Բժեզինսկին հայտարարել է, որ Թուրքիան, չնայած իր կրոնական տարբերությանը, հանդիսանում է Արևմուտքի մասնիկը. «Թուրքիան, ինչպես ռազմավարական, այնպես էլ քաղաքական տեսանկյունից, պետք է համարվի Արևմուտքի բաղկացուցիչ մասը: Իմ կարծիքով՝ չնայած Թուրքիայի կրոնական տարբերությանը, նա հանդիսանում է Արևմուտքի մի մասը: Ռազմավարական ու ՆԱՏՕ-ի հետ կապերի տեսանկյունից Թուրքիան շատ կարևոր երկիր է Եվրոպայի անվտանգության համար:
Թուրքիան կարևոր դեր է խաղում նաև ՆԱՏՕ-ում: Թուրքիան ՆԱՏՕ-ի 4 ազդեցիկ անդամներից մեկն է: Թուրքիան լավ օրինակ է Իրանի հետագա զարգացման համար՝ նրա հետ ունենալով սոցիալ-տնտեսական մի շարք ընդհանրություններ: Բացի այդ, Թուրքիան ունի ամենամեծ ժողովրդավարությունը Մերձավոր Արևելքում և կարևոր դեր է խաղում այդ տարածաշրջանի կայունության հարցում»: