Թիվ 4 ընտրատեղամասում մեծամասնական ընտրակարգով և ՀՀԿ համամասնական ցուցակի 155-րդ տեղում առաջադրված Արտակ Սարգսյանի եկամուտներն ամսական կազմել են 366 հզ. դրամ, որից 201 հզ. դրամը՝ «ՍԱՍ հոլդինգ» ՓԲԸ-ի նախագահությունից աշխատավարձն է, իսկ 165 հզ. դրամը՝ «ՐԻՏՈՍ» ՓԲԸ-ից ստացած աշխատավարձը:
ԿԸՀ-ից «Առաջին լրատվական»-ին տրամադրված գույքի և եկամուտների հայտարարագրից տեղեկանում ենք, որ 2012 թ. մարտի 1-ի դրությամբ նրա բանկային հաշվեհամարներին եղել է 645.6 մլն դրամ և մոտ 25 հզ. դոլար գումար:
Ա. Սարգսյանը հայտարարագրել է 8 ձեռնարկություններ, որոնցից «Լանդ Լորդ» ՍՊԸ-ն 100% բաժնետերն է, իսկ «Լանդֆռո» ՍՊԸ-ի, «Սաս-Գրուպ» ՍՊԸ-ի, «Գորտենզա» ՓԲԸ-ի, «Միրնա» ՓԲԸ-ի, «ՍԱՍ Հոլդինգ» ՓԲԸ-ի, «ՐԻՏՈՍ» ՓԲԸ-ի և «ՍԱՍ ՅՈՒ ԷՍ ԷՅ» ՍՊԸ-ի 50%-ի բաժնետերը: Ընդ որում, 2011 թ. 1000 խոշոր հարկատուների ցուցակում «Լանդֆռո»-ն գտնվում է 351-րդ տեղում և վճարել է 235.6 մլն դրամ հարկ: Այդ ցուցակում է նաև «Սաս-Գրուպ»-ը՝ 406-րդ տեղ և 202.9 մլն դրամ հարկային վճարումներ ցուցանիշով: Սակայն, փաստորեն, այս ձեռնարկությունները վնասով են աշխատել և իրենց սեփականատիրոջ համար շահույթ չեն ապահովել, քանի որ այդպիսին հայտարարագրում նշված չէ:
Որպես անշարժ գույք՝ Ա. Սարգսյանը հայտարարագրել է 3 բնակելի տուն Երևանում՝ 1-ը Մաշտոցի պողոտայում (80.7 քմ), 2-ն Անդրֆեդերացիայի նրբանցքում (66.4 քմ և 75 քմ), և վերջինների հարևանությամբ 144.7 քմ տարածք:
«Արտակ Սարգսյան» բարեգործական հիմնադրամի հոգաբարձուների խորհրդի նախագահի ավտոպարկում կա 5 մեքենա՝ «Տոյոտա Պռադո» (2008 թ.), «Մերսեդես S550» (2010 թ.), «Նիսսան TIIDA» (2009 թ.), «Մերսեդես S350» (2006 թ.), «Ռենջ Ռովեր VOUGE» (2011 թ.): 8 մլն դրամը գերազանցող որևէ գույք պատգամավորության թեկնածուն չի հայտարարագրել:
