Բրիտանական Jane’s-ի փոխանցմամբ՝ 2011 թվականին Թուրքիայի ռազմական արտահանումը կազմել է 1.1 միլիարդ դոլար: Այս մասին հայտարարել է Թուրքիայի պաշտպանական արդյունաբերության գլխավոր վարչությունը (SSM):
2010 թվականին Թուրքիայի ռազմական արտահանումը կազմել էր 853 միլիոն դոլար: Թուրքիայի ռազմական արտադրանքի հիմնական գնորդներն են Սաուդյան Արաբիան, Մալայզիան ու ԱՄԷ-ն:
2012-2016 թվականների համար նախատեսված SSM-ի ռազմավարական պլանի համաձայն՝ մինչև 2016 թվականը Թուրքիայի ռազմական արտահանման ծավալը հասցվելու է 2 միլիարդ դոլարի:
Ներկայումս Թուրքիան ռազմա-տեխնիկական համագործակցության ընդլայնման շուրջ բանակցություններ է վարում Ադրբեջանի, Սաուդյան Արաբիայի և Ղազախստանի հետ: Օրինակ՝ այս տարվա մարտին Թուրքիան Ադրբեջանին առաջարկել է համատեղ արտադրել թուրքական Altay տանկը: