Համացանցային Google ընկերությունը երկուշաբթի կփակի իր Google Wave ծառայությունը, որը նախատեսված է շփման և ֆայլերի փոխանակության համար:
Google Wave ծառայությունը թողարկվել է 2009թ-ին, իսկ բաց գրանցումը սկսվել է միայն 2010թ-ի մայիսից սկսած, սակայն 2010թ-ի օգոստոսին ընկերությունը արդեն հայտարարել էր ծառայության զարգացման աշխատանքների դադարեցման մասին: Ծառայության փակվելու պատճառը օգտատերերի մոտ ցածր պահանջարկն է:
Google ընկերությունը, թողարկելով այս ծառայությունը, ավելի մեծ հույսեր էր կապում դրա հետ, քանզի ենթադրվում էր, որ այն կարող է փոխարինել էլեկտրոնային փոստին: Ծառայության առանձնահատկությունն այն էր, որ օգտատերերը կարող էին ֆայլեր փոխանակել իրական ժամանակում` առանց բրաուզերից դուրս գալու, որտեղ միացված է ծառայությունը:
Վերջերս Google-ը փակեց մի շարք ծառայություններ: Դա պայմանավորված է նրանով, որ ընկերությունը ցանկանում է կենտրոնանալ ավելի առաջնային խնդիրների վրա: Այս մասին 2011թ-ին հայտարարել է ընկերության գլխավոր տնօրեն Լարի Փեյջը:
