Discovery հեռուստաալիքը Մեքսիկայի Սոնորա անապատում պայթեցրել է «Բոինգ-727» ինքնաթիռը: Ինչպես նշված է Discovery-ի կայքէջում, թեստն անցկացվել է ավիավթարների դեպքում փրկվելու հնարավորության մասին վավերագրական ֆիլմի նկարահանման շրջանակում:
Մինչև 170 մարդ տեղավորող ինքնաթիռը լցված է եղել մանեկեններով ու տեսախցիկներով, իսկ օդաչուները վայրէջքից առաջ կատապուլտի են դիմել: Գետնի հետ բախման ժամանակ ինքնաթիռի առջևի մասն անջատվել է:
Ինքնաթիռի կործանումը բնորոշվել է որպես լուրջ ավիաաղետ, որի ժամանակ ևս ուղևորները հնարավորություն ունեն փրկվելու: Հեռուստատեսության աշխատակիցները, նախագիծը պատրաստելով մի շարք գիտնականների հետ, ցանկանում էին տեսնել, թե ինչ է լինում օդաչուների խցիկի և ուղևորների հետ:
Curiosity («Հետաքրքրություն») ծրագրի շրջանակում, որի համար էին արվել նկարահանումները, կուսումնասիրվի հարցը, թե ինչպես նվազեցնել ավիավթարների ժամանակ մահացության թիվը:
Ինչպես գրում է Yahoo! New Zealand-ը, հաղորդումը եթեր կհեռարձակվի այս տարի Discovery (ԱՄՆ), Channel 4 (Մեծ Բրիտանիա) ու Pro Sieben (Գերմանիա) հեռուստաալիքներով:
