Արարատի և Արմավիրի մարզերի այգիներում գլուխ են բարձրացրել սնկային հիվանդությունները: Ինչպես այսօր լրագրողների հետ հանդիպմանը հայտարարեց Ագրարագյուղացիական միության նախագահ Հրաչ Բերբերյանը՝ եթե համատարած ավիացիոն պայքար չտարվի հիվանդության դեմ, ապա բերքի զգալի կորուստ կլինի: Ընդ որում` առանձին գյուղացիների կողմից կատարվող սրսկումները օգուտ չեն տա, քանի որ հարևան այգիներից հիվանդությունը հեշտությամբ կրկին կտարածվի: Հակասնկային պրեպարատներով 1 անգամ սրսկումը կարժենա 8-10 հազար դրամ, սակայն շուտով սպասվող անձրևները եթե մաքրեն բուժանյութը, ապա հարկ կլինի կրկին սրսկել:
«Ծառերի վրա ներքևից տերևաթափ է սկսվում: Փոքր պտղի վրա նկատվում է սնկի առկայություն: Սա շատ լուրջ հիվանդություն է, և նշանակում է՝ բերքի կորուստ կունենանք: Իսկ եթե 2-3 տարի չպայքարենք դրա դեմ, ապա ծառը կոչնչանա»,- ասաց Հ. Բերբերյանը:
Ըստ նրա՝ սպասվում է, որ այս տարի ծիրանի բերքը նախորդ տարվանից մոտ 5000 տոննայով ավելի կլինի`շուրջ 35 հազար տոննա, եթե, իհարկե, ժամանակին սնկային հիվանդությունների դեմ սրսկումներ արվեն:
«Առաջին լրատվական»-ի հարցին՝ կառավարության նիստում հայտարարվեց, թե ձյուն կար, բայց ջրի պակաս կա գետերում և ջրամբարներում, մի՞թե գյուղացին ջրի պակաս ունի, Հ. Բերբերյանը պատասխանեց՝ գյուղացին ջրով ապահովված է: Սակայն նա նշեց, որ լուրջ բարեփոխումների ծրագիր պետք է իրականացվի, որ գյուղացին ինքը գնի ջուրը:
