«Առաջին լրատվական»-ի Real Politik հաղորդաշարի հյուրն է էդմոն Մարուքյանը:
– Երբ նոր էր մեկնարկել քարոզարշավը, ինձ համար շատ կարևոր էր իմանալ, թե անկուսակցական լինելը ինչքան կարող է շահեկան լինել այն քաղաքական ներկապնակի պայմաններում, երբ հիմնական խաղացողները հանդես են գալիս տարբեր կուսակցությունների կողմից: Դուք ինչպե՞ս եք գնահատում քարոզարշավը: Վերջին շաբաթն է, և դրանից հետո մենք կունենանք այն ԱԺ-ն, որի մասին արդեն որոշակի պատկերացում ունենք: Ինչպե՞ս եք գնահատում Ձեր հնարավորությունը:
– Ես՝ ինքս, չէի պատկերացնում, որ անկախ պատգամավոր լինելը կարող է այդքան դրական լինել: Առաջին հարցը, որ տրվում է հանդիպումների ժամանակ, այն է, թե որ կուսակցությունից եմ: Կուսակցական պատգամավորների հանդեպ կա մի տեսակ ընդգծված անհանդուրժողականություն:
-Վանաձորը բավական հետաքրքիր պատմություն ունի: Գլխավոր դերակատարն այնտեղ եղել է ընդդիմադիր Վիկտոր Դալլաքյանը, և այսօր նա հանդես է գալիս իշխող կուսակցության անունից: Այս փորձառությունն ունենալով՝ վանաձորցիներն արդեն հստակ պատկերացում ունեն այն գործիչների մասին, որոնք կարող են խոսել այլ հռետորաբանությամբ, բայց տարիներ անց բացահայտեն, թե ով էին իրենք իրականում: Նա ձեր հիմնական մրցակիցն է:
– Ընտրողները կարծում են, որ հնարավոր է՝ ես էլ լքեմ նրանց և դառնամ ինչ-որ մեկի կամակատարը: Նրանք հասկանում են, որ այդ հռետորաբանությունը փոխվելու է, և կարելի է ասել, որ նույնիսկ չի եղել իրական: Իմ պարագայում նայում են իմ կենսագրությանը, ապաքաղաքական գործունեությունը, և նրանք կարողանում են տարանջատել այն, ինչ ունեցել են Դալլաքյանի օրոք, և այն, ինչ կարող են ունենալ իմ պարագայում:
– Թիվ 30 ընտրատարածքը հետաքրքիր է նաև նրանով, որ ամբողջ Հայաստանում մենք չունենք մի թեկնածու, որ այս ընտրությունների չգոյության պայմաններում կարող էր այլընտրանք ապահովել: Նույնիսկ ակտիվ ընտրողները, այդ չգտնելով, հիասթափված կարող են չմասնակցել ընտրությանը: Իսկ մեր ժողովուրդը շատ հստակ կարողանում է նշմարել, թե ով ով է և ով ում շահն է հետապնդում ու սպասարկում: Ձեր առաջարկը հետաքրքիր է նաև այս տեսանկյունից, որ քաղաքացիական հասարակության կայացման ոլորտում ջանքեր չխնայած մարդը հայտ է ներկայացնում՝ ԱԺ-ի դեսպան դառնալու: Սա եզակի շանս է, որ մենք մեր խոսնակը և քաղաքացիական հասարակության խոսնակն ունենանք այնտեղ:
– Վանաձորում քաղաքացիական հասարակությունը շատ ուժեղ է, և հասարակությունը հասկանում է, թե որն է քաղաքացիական հասարակությունը: Այս իրավիճակում ես այլընտրանք եմ ներկայացրել: Նախ` առաջինը, որ ես առաջարկել եմ սերնդափոխություն, մյուս կուսակցությունները նման բան չեն առաջարկել: Մարդիկ հիշում են, որ ես միշտ եղել եմ նրանց կողքին, պայքարել եմ երևույթների դեմ: Մենք ոչ թե անձի խնդիր ենք դրել, այլ երևույթի. ասենք՝ այս երևույթը ապականում է մեր երկիրը: Այս շեշտադրմամբ ես շարունակում եմ իմ քարոզարշավը: Շատերին դուր չի գալիս, որ ես սև PR-ով չեմ զբաղվում և ցեխ չեմ շպրտում իմ հակառակորդի երեսին:
– Ձեր ընտրատարածքում առաջադրվել են նաև ընդդիմադիր գործիչներ: Մեկը քաղբանտարկյալ է, որի ազատման համար դուք պայքարել եք: Դուք պայքարել եք նրա շահերի համար: Այսօր հասարակությունը, հասկանալով այդ հանգամանքը, իր նախապատվությունն է տալիս անկուսակցական թեկնածուին: Չե՞ք կարծում, որ ԱԺ-ում միայնակ գործելը կարող է շատ դժվարություններ ստեղծել:
– Ես չեմ կարծում, որ ընտրվելու դեպքում լինելու եմ միայնակ: Ընտրվելու պարագայում ես ունենալու եմ 10 հազար ընտրողների ձայնն իմ թիկունքում, որը շատ լուրջ ուժ է: Ես կարծում եմ, որ իմ խոսքը լինելու է ծանրակշիռ: Ես աջ ազատական գաղափարների կողմնակից եմ և կարծում եմ, որ կարող եմ դաշնակիցներ գտնել ԱԺ-ում և համագործակցել: Ես որևէ քաղաքական կուսակցության գաղափարախոսությունից կաշկանդված չեմ: Ես բոլոր ուժերի հետ, անկախ նրանից՝ ընդդիմադիր են, թե իշխանամետ, կարող եմ համագործակցել: Բոլորն էլ ցանկանում են ԱԺ-ում ունենալ պրոֆեսիոնալ, ով գիտի միջազգային փորձը: Չէ՞ որ ես Հայաստանից դատական գործերը եվրոպական դատարան ներկայացնող փաստաբանն եմ: Բոլորին էլ, ըստ էության, ձեռնտու է ունենալ այնպիսի պատգամավորներ, որոնք գործող ուժ են լինելու: Ես չեմ ուզում, որ որևէ կուսակցության ղեկավար կամ խմբակցության ղեկավար ինձ թելադրի որևէ օրինագծի կողմ կամ դեմ քվեարկեմ: Փաստաբանի մասնագիտությունը ՀՀ-ում ամենաանկախ մասնագիտություններից մեկն է: Ես, ընտրվելով, տեսնում եմ անկախ պատգամավորի դիրքը, որի վրա որևէ մեկը չի կարող ազդել: Այս պահի դրությամբ, եթե վաղը՝ առավոտյան, լինեն ընտրությունները, հաղթելու եմ ես, բայց չգիտեմ թե ինչ կլինի երեք օր հետո:
– Իհարկե՛, ես կարծում եմ, որ զարգացումներն առաջիկայում ավելի թեժանալու են ամսի 6-ից հետո: Հետընտրական ինչպիսի՞ զարգացումներ եք տեսնում: Իշխանությունները նորից կգնան կեղծիքների և նույն ձեր ընտրատարածքում կեղծիքներով կպարտադրեն իրենց թեկնածուին: Ինչպե՞ս եք պատրաստվում պայքարել այդ մեքենայի դեմ: Ունե՞ք այդքան ներուժ, որ չհիասթափեցնեն մեր ընտրողին:
– Ես մի մարդու համար միշտ դուրս եմ եկել ամբողջ համակարգի դեմ: Նաև նշեմ, որ ՀՀ-ում երկու փաստաբան կա, որ եվրոպական դատարանում Ադրբեջանի դեմ են հանդես եկել: Ես դա, իհարկե՛, կանեմ իմ ընտրողի համար, կգնամ մինչև վերջ: Այս առումով ոչ ոք չի կարող ընտրախախտում թույլ տալ: Դա այն քաղաքական ուժը չէ, որին կարելի է ճնշել: Իհարկե՛, չեմ բացառում, որ կարող են նաև նման բաներ լինել: Այդ առումով մենք ունենք մեր հստակ մշակած ծրագրերը: Կլինի իրավական ճանապարհով շատ ավելի խիստ պատիժ, քան երբևէ որևէ քաղաքական ուժ արել է: Ես կարծում եմ, որ հետընտրական բախումներ, անհանգստություններ չեն լինելու, որովհետև ես տեսնում եմ, քարոզարշավի ընթացքը դրա մասին է խոսում:
– Հետաքրքիր է, որ Վիկտոր Դալլաքյանը, որպես անկուսակցական, միշտ հաղթել է ընդդիմադիր հռետորաբանության հաշվին: Այստեղ անկեղծ լինելը շատ կարևոր է վանաձորցիների համար: Անկախ ընդդիմադրի սինդրոմը էապես կար՞ող է ազդել ձեր հաղթանակին:
– Անկախ ընտրությունների արդյունքներից՝ մենք ստեղծել ենք նախադեպ: Ես հույս ունեմ, որ մյուս ընտրությունների ժամանակ այս նախադեպը կկիրառվի: Ապաքաղաքական, կայուն քաղաքական գործընթացների վրա ազդեցություն ունեցող մարդկանց մասնակցությունը շատ կարևոր է: