Ֆրիտյոֆ Նանսենի մեդալով է պարգևատրվել Իգոր Կլիմկոն

Ֆրիտյոֆ Նանսենի մեդալով է պարգևատրվել «ԱրմենՏել» ընկերության տնօրեն Իգոր Կլիմկոն: Այսօր տեղի ունեցավ մեդալի հանձնման պաշտոնական արարողությունը: Պարգևը շնորհեց «Ֆրիտյոֆ Նանսեն» հիմնադրամի հոգաբարձուների խորհրդի նախագահ Ֆելիքս Բախչինյանը: «Այս տարի լրանում է մեծ մարդասեր, 320,000 հայերի փրկիչ Ֆրիտյոֆ Նանսենի 150-ամյակը: Այս առիթով ստեղծվել է կառավարական հանձնաժողով,այս տարի բացվելու է Նանսենի տուն-թանգարանն ու արձանը,- իր խոսքում ասաց հիմնադրամի տնօրենը։-Այսօր էլ հայ ժողովրդի կողքին կանգնած են շատ օտարերկրացիներ: Նրանցից մեկն է Իգոր Կլիմկոն, որը Հայաստանում մարդասիրական մեծ գործունեություն է ծավալում»:
«Այս պարգևն ինձ համար մեծ պատիվ ու պատասխանատվություն է: Սա միայն իմ ձեռքբերումը չէ, այլ «ԱրմենՏել» ընկերության ողջ անձակազմինը»,- իր խոսքում ասաց Իգոր Կլիմկոն:
Պարգևը շնորհվեց Հայաստանում հասարակական ակտիվ գործունեության համար: 2010 թ. ընթացքում «ԱրմենՏել» ընկերությունը Հայաստանում իրականացրել է 30 սոցիալական նախագծեր` ուղղված կրթական, մշակութային և մարզական ոլորտներին: