«Դինո գոլդ մայնինգ քամփնի» ՓԲԸ-ի սեփականատեր «Dandee Precious Metals» կանադական ընկերության Բուլղարիայի և Հայաստանի պատասխանատու- կառավարիչ Ռիք Հոուսը Երևանում երկուշաբթի հանդիպել է բնապահպանների հետ: «Էկոլոգիական անվտանգության ապահովման և ժողովրդավարության զարգացման» ՀԿ-ի իրավախորհրդատու Արթուր Ղազարյանը լրագրողներին ասել է, որ հանդիպումը կայացել է կանադական կողմի առաջարկով: Բնապահպանները ներկայացրել են Շահումյանի բազմամետաղային հանքավայրի բաց եղանակով հնարավոր շահագործման հետևանքով առաջացած վտանգները: Ըստ բնապահպանների` ժամանակակից որևէ տեխնոլոգիա չի կարող չեզոքացնել վտանգը: Այս հարցի շուրջ երկու կողմերը համաձայնություն չեկան: Հիշեցնենք, որ նախօրեին ընկերությունը հայտարարություն էր տարածել, որ Ռիք Հոուսի այցը կապված չէ հասարակական հնչեղություն ստացած բաց հանքի շահագործման հետ: Այցը հերթականն է ու աշխատանքային: Բայց բարձրաստիճան հյուրը առաջինը քննարկեց հենց դա: Նախատեսված է նաև հանդիպում Կապանի քաղաքապետի ու բնապահպանական պետական տեսչության` Սյունիքի տարածքային բաժնի պետի հետ: Ավելացնենք, որ բնապահպանները բարձրացրել են նաև ընկերությունում գործող աշխատավարձերի բաշխման կարգի, ստորգետնյա հանքում անվտանգության կանոնների պահպանման, արտասահմանից մեծ թվով մասնագետների հրավիրման հարցերը: Կանադական կողմը խոստացել է որոշ բարեփոխումներ իրականացնել ընկերությունում: