Թուրքական Anadolu գործակալության փոխանցմամբ՝ Թուրքիայի արտգործնախարար Ահմեդ Դավութօղլուն երիտասարդ դիվանագետների հետ ունեցած հանդիպման ժամանակ հայտարարել է, որ Թուրքիան չունի թշնամիներ.
«Թուրքիայի արտաքին քաղաքականության մեջ մենք երկրները դասակարգում ենք որպես բարեկամական ու պոտենցիալ բարեկամական: Դիվանագիտությունը հանդիսանում է հնագույն մասնագիտություններից մեկը: Այն ներառում է բազմաթիվ մեթոդներ և նախատեսում է տեսության ու պրակտիկայի համատեղ օգտագործում:
Դիվանագիտության հիմնական առաջադրանքը հանդիսանում է գլոբալ խաղաղության հաստատումը: Թուրքիայի արտաքին քաղաքականությունում չկան թշնամական երկրներ, երկրները բնութագրվում են որպես բարեկամական ու պոտենցիալ բարեկամական»:
Հիշեցնենք, որ օրեր առաջ Ահմեդ Դավութօղլուն հայտարարել էր, թե Թուրքիայի արտաքին քաղաքականությունը հենված է «զրո խնդիր հարևանների հետ» սկզբունքի վրա, ինչը հենված է Քեմալ Աթաթուրքի «Խաղաղություն երկրում, խաղաղություն աշխարհում» խոսքերի վրա.
«Մենք շոու չենք անում, կոնկրետ քայլեր ենք ձեռնարկում: Թուրքիան իսկապես շատ լավ հարաբերություններ ունի հարևան երկրների հետ՝ բացառությամբ երեք երկրներից: Մենք սերտ հարաբերություններ ունենք Հունաստանի, Ռուսաստանի, Վրաստանի, Ուկրաինայի, Ռումինիայի, Բուլղարիայի, Ադրբեջանի հետ:
Դա չի կարելի ասել Թուրքիայի հարևան երեք երկրների պարագայում՝ Հայաստան, Իսրայել և Սիրիա: Դրանք այն երկրներն են, որոնց հետ դժվար է պայմանավորվել: Թուրքիայի համար դժվար է կայուն հարաբերություններ պահպանել այդ երկրների հետ»: