ԵՄ-ն այսօր Իսրայելից պահանջել է լուծել Հորդանան գետի Արևմտյան ափի երեք բնակավայրերի օրինականացման հարցը: Խոսքը Բուրխինի, Ռեխամի և Սանսանի մասին է:
«Այդ բնակավայրերը միջազգային իրավունքի տեսանկյունից անօրինական են, նրանք խոչընդոտում են խաղաղությանը և սպառնալիքի տակ են դնում երկու պետությունների կենսունակությունը»,-ասվում է ԵՄ արտաքին գործերի և անվտանգության քաղաքականության գերագույն հանձնակատար Քեթրին Էշթոնի հայտարարության մեջ։ Այս մասին հաղորդում է ИТАР-ТАСС-ը:
Եվրոպական դիվանագիտության ղեկավարի խոսքերով՝ ԵՄ-ն բազմիցս պնդել է, որ Իսրայելը «դադարեցնի բնակավայրային գործունեությունը»:
«Նման քայլերը դեմ են դուրս գալիս «կվարտետի» 2012 թվականի ապրիլի 11-ի հայտարարությանը, որում արտահայտվում է անհանգստություն միակողմանի, սադրիչ գործողությունների, այդ թվում՝ բնակավայրային գործունեության առնչությամբ»,- ընդգծում է Էշթոնը:
Ինչպես երկուշաբթի օրը հայտարարել է Իսրայելի վարչապետ Բենիամին Նեթանյահուի մամլո ծառայությունը, ապրիլի 23-ի նիստի ժամանակ նախարարների գրասենյակը «որոշել է 1990-ական թվականներին հիմնադրված երեք բնակավայրերի կարգավիճակն օրինականացնել»: Բուրխին բնակավայրում, որը գտնվում է Հորդանան գետի Արևմտյան ափին, ներկա պահին ապրում է մոտ 350 մարդ, իսկ Ռեխամում և Սանսանում՝ մոտ 240 մարդ: Ավելի վաղ պաղեստինյան կողմը հայտարարել էր, որ քննարկում է այդ հարցով ՄԱԿ ԱԽ դիմելու հնարավորությունը։
