Business-Грузия-ի փոխանցմամբ՝ Վրաստանի գյուղատնտեսության նախարար Զազա Գոռոզիան և արդարադատության նախարարության եկամուտների ծառայության ղեկավար Ջաբա Էբանոիձեն ալկոհոլային խմիչքներ և գինի արտադրող տեղական ընկերություններին ներկայացրել են իրենց համատեղ նախաձեռնությունը, որն առնչվում է ակցիզային արտոնություններին:
Էբանոիձեի խոսքերով՝ երբ այսօր կոնյակ արտադրողը գինու գործարաններում գնում է սպիրտ, նա ստիպված է լինում վճարել ակցիզային մեծ հարկ՝ մեկ լիտրի դիմաց 4.60 լարի. «Ելնելով դրանից՝ մենք վերացնում ենք կոնյակի արտադրության համար անհրաժեշտ կոնյակի սպիրտի ակցիզը, ինչը կմեծացնի կոնյակի սպիրտի սպառումը»:
Գոռոզիան իր հերթին հայտարարել է, որ ակցիզից ազատվելը դրականորեն կանդրադառնա ոչ միայն գինեգործների ու կոնյակ արտադրողների վրա, այլև այն բոլոր գյուղացիների վրա, որոնք զբաղվում են խաղողագործությամբ:
Վրացական «Սարաջիշվիլի» ընկերության գործադիր տնօրեն Զուրաբ Բուբուտեիշվիլին հայտարարել է, որ արտադրողներն այդ արտոնության շնորհիվ կկարողանան տարեկան տնտեսել 1-1.5 միլիոն լարի, ինչը կուղղվի արտադրանքի զարգացմանն ու արտահանման ավելացմանը:
