Վրաստանի արտգործնախարարությունն այսօր մեկնաբանել է հայտնված այն տեղեկությունը, որի համաձայն, ռուսական զինված ուժերը Հարավային Օսիայում Toчка-У օպերատիվ-տակտիկական հրթիռային համակարգ է տեղակայվել: Грузия-online-ը տեղեկացնում է, որ հայտարարության մեջ ասվում է, թե ռուսական զորքերը ժամանակին այդ հրթիռային համակարգով ոչնչացրել են Չեչնիայի Բամուտ բնակավայրը, և դրանց վրա նախկինում տեղադրվել են կասետային և միջուկային մարտագլխիկներ: «Համակարգերի տեղակայումը օկուպացված Ցխինվալի մարզում ուղղակի սպառնալիք է Վրաստանին և նրա խաղաղ բնակչությանը: Այս քայլով Ռուսաստանը շարունակում է Վրաստանի նկատմամբ իր ագրեսիվ քաղաքականությունը, որի նպատակը վրացական պետականության և բնակչության ոչնչացումն է, ինչպես նաև Կովկասում իրավիճակի լայնածավալ ապակայունացումը»: Հայտարարության մեջ Վրաստանը կոչ է անում միջազգային հանրությանը ակտիվ և արդյունավետ քայլեր ձեռնարկել Վրաստանի նկատմամբ ագրեսիվ Ռուսաստանի գործողությունները դադարեցնելու, օգոստոսյան պատերազմից հետո ուժի չկիրառման ստանձնած պարտավորության կատարման և Վրաստանի դեօկուպացիայի նպատակով: