Երեկ հայտնի դարձավ, որ Ֆրանսիայի նախագահական ընտրությունների երկրորդ փուլը տեղի կունենա մայիսի 6-ին: Նախնական արդյունքներով` Ֆրանսիայի նախագահի սոցիալիստ թեկնածուն հավաքել է ընտրողների ձայների 27-28 տոկոսը: Նրա հիմնական մրցակիցը` Ֆրանսիայի գործող նախագահ Նիկոլա Սարկոզին, ստացել էր ընտրողների 25-26 տոկոսը: Ձայների 16 տոկոսով երրորդ տեղում է «Ազգային ճակատի» առաջնորդ Մարին Լե Պենը: Երկրորդ փուլ դուրս գալու ամենամեծ հնարավորությունը ունեն Նիկոլա Սարկոզին և Ֆրանսուա Հոլանդը:
Նախագահական ընտրությունների երկրորդ փուլի ընթացքում ո՞ւմ է իր քվեն տալու հայ համայնքը, և ո՞ւմ հնարավորություններն են այս պահի դրությամբ ավելի բարձր գնահատվում:
Այս հարցերի շուրջ «Առաջին լրատվական»-ը զրուցեց Արևմտյան Եվրոպայում ՀՅԴ համանախագահ, Ֆրանսիայի հայկական կազմակերպությունների համակարգող խորհրդի համանախագահ Մուրադ Փափազյանի հետ:
Ըստ նրա` դժվար է ասել, թե հայ համայնքն ում կտա իր քվեն, սակայն նշեց, որ Դաշնակցությունը սոցիալիստ թեկնածուին է աջակցում: Մ. Փափազյանը տեղեկացրեց, որ Ֆրանսուա Հոլանդի հետ 15 տարի է՝ քաղաքական համագործակցության մեջ են:
«Այս 15 տարիների ընթացքում իր բոլոր խոստումներին տեր է եղել՝ լինի դա Հայոց ցեղասպանության հարցը Ֆրանսիայի խորհրդարանում, Ցեղասպանության հերքումը քրեականացնող օրինագիծը, թե Թուրքիայի անդամակցությունը ԵՄ-ին: Նա տարիներ ի վեր ընդգծում է, որ Թուրքիան չի կարող անդամակցել ԵՄ-ին, և Եվրոպայի անունից ֆրանսիան պետք է պայմաններ առաջադրի Թուրքիային, այն է՝ Հայոց ցեղասպանության ճանաչումը:
Հոլանդը 2007թ. եղել է Հայաստանում և խոսելով ԼՂՀ հիմնախնդրի մասին՝ ասել է, որ խաղաղ կարգավորման կողմնակիցն է և ոչ մի դեպքում չպետք է թույլ տալ պատերազմական իրավիճակ: Նա նաև ասել է, որ պետք է Ադրբեջանին պարտադրել՝ կատարելու ստանձնած բոլոր պարտավորությունները: Այս ամենը հիմք ծառայեց մեր քաղաքական մտերմության համար»,- մանրամասնեց Մ. Փափազյանը` հավելելով, որ այս ընթացքում մասնակցել են Հոլանդի բոլոր քարոզարշավներին և աջակցել նրան: Նա նաև այն կարծիքին է, որ հայ համայնքը պետք է իր քվեն տա հօգուտ Ֆրանսուա Հոլանդի:
Հարցին՝ Ֆրանսիայում ո՞ր թեկնածուի հնարավորություններն են ավելի մեծ, նա պատասխանեց՝ եթե դիտարկենք երեկ գիշերվա արդյունքները և այն, թե որ քաղաքական ուժերն են աջակցում թեկնածուներին, ապա Հոլանդի հնարավորություններն ավելի մեծ են:
Մեկնաբանելով իր տեսակետը` նա ասաց, որ որևէ քաղաքական ուժ և նախագահական ընտրությունների առաջին փուլում մասնակցած թեկնածու Սարկոզիին իր աջակցությունը չի հայտնել, իսկ Հոլանդն ունի և՛ ծայրահեղ ձախերի, և՛ կանաչների, և մի շարք քաղաքական ուժերի քվեները:
«Երեկ գիշեր հրապարակված հարցումների արդյունքները վկայեցին, որ Հոլանդն ունի ձայների 56%-ը, իսկ Սարկոզին՝ 44%-ը: Եթե նույնիսկ մինչև ընտրությունները Սարկոզին այլ ձայներ շահի, միևնույն է՝ արդյունքների պատկերը չի կարող փոխվել»,- մեկնաբանեց Մուրադ Փափազյանը` հավելելով, որ երկրորդ փուլում կհաղթի Ֆրանսուա Հոլանդը:
