ԱՄՆ-ում 80 տարեկանում մահացել է նախագահ Ռիչարդ Նիքսոնի նախկին խորհրդական Չարլզ Քոլսոնը: CNN-ի ներկայացմամբ` նա մահացել է ապրիլի 21-ին Վիրջինիայի նահանգի հիվանդանոցներից մեկում:
Երեք շաբաթ առաջ Քոլսոնը հոսպիտալացվել էր ուժեղ գլխապտույտի պատճառով: Նրան ախտորոշել էին ուղեղի արյան զեղում և վիրահատել էին, որից հետո նա այդպես էլ չէր ապաքինվել:
1969թ. Քոլսոնն օգնել է Նիքսոնին հաղթել նախագահական ընտրություններում, որից հետո դարձել է նրա նախագահի հատուկ խորհրդականը:
Ուոթեգեթյան սկանդալի պատճառով Նիսքսոնը լքեց պաշտոնը, իսկ նրա համախոհներից շատերը հայտնվեցին դատապարտյալի աթոռին: Նրանց թվում էր նաև Քոլսոնը, որին մեղադրեցին արդարադատությանը խոչընդոտելու համար և 1974 թ. դատապարտեցին ազատազրկման: Նա բանտարկված մնաց մինչև 1975թ.: Բանտից դուրս գալով` Քոլսոնը հայտարարեց, որ այլևս չի զբաղվելու քաղաքականությամբ: Նա տարված էր կրոնով և 1976թ. հիմնեց «Բանտային եղբայրություն» քրիստոնեական կազմակերպությունը:
2005թ. Չալզ Քոլսոնը հայտնվեց Time ամսագրի կազմած` աշխարհի ամենաազդեցիկ 25 ամերիկացի քարոզիչների ցուցակում:
Քոլսոնը գրել է ավելի քան 30 գիրք` վաճառելով մոտ հինգ միլիոն օրինակ:
