Հարավաֆրիկյան Հանրապետության նախագահ Ջեյկոբ Զուման դարձյալ ամուսնացել է. նրա նոր կինը նախագահի չորրորդ «գործող» կինն է: Այս մասին հաղորդում է Reuters-ը՝ վկայակոչելով Զումայի վարչակազմին:
Փակ արարողությունը տեղի է ունեցել ուրբաթ՝ Զումայի անձնական տանը: Նախագահ Զուման և նրա նոր կինը՝ Բոնգի Նգեման, որն ավելի վաղ աշխատել է IT-տեխնոլոգիաների ոլորտում, վաղուց են ծանոթ: Զումայի նոր կինը բավական հայտնի է ՀԱՀ-ում և արդեն մի քանի անգամ ուղեկցել է նրան պաշտոնական այցերի ընթացքում:
Նշենք, որ Զուման ծագումով զուլուս է. ավանդաբար այդ ցեղը բազմակնության կողմնակից է:
Նախագահի վարչակազմից հայտնել են, որ հարսանեկան արարողությունը տեղի է ունեցել զուլուսների ավանդույթներով:
«Ե՛վ հարսնացուն, և՛ փեսան մասնակցել են ավանդական տոնական պարին»,- ասվում է Զումայի ներկայացուցիչների հաղորդագրության մեջ:
Այսպիսով, ՀԱՀ նախագահն արդեն 4 կին և 21 երեխա ունի: ՀԱՀ-ում պաշտոնապես գոյություն չունի «առաջին տիկնոջ» պարտականություն, և նրա կանանցից ոչ մեկը պետական միջոցներ ստանալու կամ տնօրինելու սահմանադրական իրավունք չունի:
