«Առաջին լրատվական»-ը տեղեկացրել է, որ մինչև փետրվարի 12-ը` «Բարգավաճ Հայաստան» կուսակցության համագումարի օրը, Գագիկ Ծառուկյանի թիմին կմիանա նաև Լեռնային Ղարաբաղի պաշտպանության բանակի նախկին ղեկավար Սամվել Բաբայանի ղեկավարած «Դաշինք» կուսակցության «բեկորները»:
Գագիկ Ծառուկյանի մամուլի քարտուղար Խաչիկ Գալստյանը «Առաջին լրատվական»-ի հետ զրույցում նշեց, որ իր տեղեկություններով, «Դաշինք» կուսակցությունը լուծարվել է մեկ տարի առաջ: «Այդ կուսակցության անդամներն ազատ են իրենց ընտրության մեջ»,- նշեց մեր զրուցակիցը: Ինչպե՞ս կվերաբերվեն այն փաստին, որ ԲՀԿ-ին միանալու ցանկություն հայտնի Սամվել Բաբայանը: «Ես նման տեղեկություն չունեմ: Բայց եթե նման ցանկություն լինի, կարծում եմ, մեր կուսակցության համար կլինի բնական»,- արձագանքեց Խաչիկ Գալստյանը:
Անցած շաբաթ լուծարվելու և ԲՀԿ-ին միանալու որոշում կայացրեց Հայաստանի առաջադիմական կուսակցությունը: Սպասվում է, որ պետք է լուծարվի և «Բարգավաճ Հայաստան» կուսակցությանը միանա նաև Հայաստանի երիտասարդական կուսակցությունը: «Բարգավաճ Հայաստանն» այդքան բա՞ց կառույց է, որպեսզի իր մեջ կարողանա միավորել բոլոր ցանկացողներին»,- հարց ուղղեցինք Խաչիկ Գալստյանին: «Մենք բաց ենք բոլոր առողջ քաղաքական ուժերի համար: Ցանկություն հայտնողները շատ-շատ են, բայց մենք նախ քննարկում ենք, հետո կայացնում որոշում»,- արձագանքեց Խաչիկ Գալստյանը: