«2012 թվականի մայիսի 6, ընտրական տեղամաս, ժամը 30 վայրկյան: Ես հավատում եմ, որ Հայաստանում հեղափոխություն է հասունանում: Կեցցե հայկական հեղափոխությունը»,- Ազատության հրապարակում իր ելույթն այսպես սկսեց «Հայկական ժամանակ» օրաթերթի խմբագիր Նիկոլ Փաշինյանը:
Նա նշեց, որ ՀՀ քաղաքացիների որոշակի հատված ընտրակեղծիքների մեքենայի մասնիկ է դառնում, ընտրութունների ժամանակ քվեարկում ոչ կամային արտահայտմամբ։
Իր ուղերձում Փաշինյանն այսպես բացատրեց 30 վայրկյանանոց հեղափոխության գաղափարը. «Եղբայրնե՛ր և քույրե՛ր, մենք ձեզանից չենք ակնկալում, որ դուք մասնակցեք մեր նախընտրական ցույցերին, որ դուք ձեր աշխատավայրերում քարոզեք ՀԱԿ-ը, սոցհարցումների ժամանակ չենք ակնկալում, որ քվեարկեք ՀԱԿ-ի օգտին, մենք ձեզնից ակնկալում ենք 30 վայրկյան: Երբ վերցրիք քվեաթերթիկը, 30 վայրկյանանոց մեր հեղափոխությունը մեկնարկում է: Քվեարկում եք Կոնգրեսի օգտին, ընդամենը 30 վայրկյան, և դուք ձեր գաղթած ազգականների ճակատագիրն եք որոշում: Ոչ ոք չի իմանա, որ դուք 30 վայրկյանով տապալել եք լֆիկասերժիկական վարչակարգը: Սաշիկն ու Լֆիկը կրակ էլ դառնան, չեն իմանա, թե դուք ոնց եք քվեարկել, իսկ քվեարկությունը լինելու է հույժ գաղտնի:
Փաշինյանն ասաց, որ չնայած չի ցանկանում իր 30 վայրկյանանոց հեղափոխության գաղափարը պղծել Նեմեցով ու Լֆիկով, բայց նշեց. «Լֆիկն ապացուցեց, որ իմաստուն հայ ժողովուրդը իրեն շատ դիպուկ անուն է դրել: Տեսաք, թե ինչպես Նեմեց Ռուբոն ճողոպրեց ՀԱԿ-ի բանավեճից, որի ֆորմատն ինքն էր որոշել, բայց Նեմեց Ռուբոն ուղիղ եթերում փախավ: Խոսող մարդը չէր փախնի: Հաջորդ անգամ կհիշես ապրիլի 16-ը և ձենդ կկտրես»:
