Նորվեգացի ահաբեկիչ Անդերս Բրեյվիկն այսօր՝ դատավարության 5-րդ օրը, հայտարարել է, որ նորմալ հանգամանքներում ինքը միանգամայն հաճելի մարդ է:
Սակայն նրա իսկ խոսքերով՝ 2006 թ. նա սկսել է իրագործել սեփական դեհումանիզացիայի մի ծրագիր՝ զանգվածային սպանության նախապատրաստվելու համար: Ինչպես հաղորդում է BBC-ն, Բրեյվիկը խոստովանել է, որ իրագործել է այդ սպանությունները, սակայն հրաժարվում է դրա համար քրեական պատասխանատվության ենթարկվել՝ հայտարարելով, որ պաշտպանել է Նորվեգիան բազմամշակութայնությունից: Նրա բնականոն տոնը սպանությունների մասին պատմելիս ապշեցուցիչ տպավորություն է թողել դատավարությանը ներկաների վրա:
Դատավարության հիմնական խնդիրներից մեկն է պարզել Բրեյվիկի հոգեկան վիճակը: Դատարանի եզրակացությունից կախված՝ նա կդատապարտվի կամ երկարատև ազատազրկման, կամ կուղարկվի հոգեբուժարան: Ինքը՝ Բրեյվիկը, պնդում է, որ միանգամայն առողջ է:
Նորվեգիայի հեռուստաընկերությունն ուղիղ հեռարձակում է միացրել դատարանի դահլիճից, սակայն Բրեյվիկի ցուցմունքը չի հեռարձակվել:
Նախնական հարցաքննության ժամանակ Բրեյվիկն ասել է, որ հասկանում է՝ ինչու են իր խոսքերը նման արձագանք առաջացրել դատարանի դահլիճում:
«Խոսքը դաժան, բարբարոսական գործողությւնների մասն է, և ես անգամ չեմ կարող պատկերացնել, թե ինչ ազդեցություն են դրանք ունեցել մարդկանց վրա»,- ասել է Բրեյվիկը:
Նրա խոսքերով՝ իր հանգիստ տոնը պաշտպանական մեխանիզմ է: Նա ասել է, որ զինվորները նույնկերպ պետք է վերաբերվեն ծայրահեղական թալիբների նկատմամբ, եթե ցանկանում են նրանց դիմակայել:
«Նույնը և ինձ է վերաբերվում: Ես վերցրել են դեհումանիզացիայի ռազմավարություն նրանց նկատմամբ, ում համարում եմ իմ օրինական նպատակը: Եթե ես այլ կերպ վարվեի, չէի կարողանա դա անել»,- ասել է Բրեյվիկը:
Պատասխանելով հարցին՝ արդյոք կարո՞ղ է ցավակցություն ունենալ մահացածների հանդեպ, Բրեյվիկը դրական է պատասխանել՝ հայտարարելով, որ իր ընկերոջ եղբոր հուղարկավորությունը իր համար շատ տխուր իրադարձություն է եղել:
«Ես կարծում եմ, որ նախքան 2006 թ.՝ մինչ ես սկսեցի փորձարկումները, ես միանգամայն այլ զգացմունքային պատկեր ունեի»,- ասել է Բրեյվիկը:
Նա պատմել է, որ մինչ այդ ինքը շատ շփվող է եղել, սակայն հետո մեկուսացրել է իրեն ընկերներից և մերձավորներից՝ մտնելով համակարգչային խաղերի աշխարհ:
Բրեյվիկի գործով դատավարությունը սկսվել է 2012 թ. ապրիլի 16-ին: Նա մեղադրվում է 2011 թ. հուլիսի 22-ին Օսլոյի կառավարության շենքի մոտ և Ուտոյա կղզում ահաբեկչության և 77 մարդու կանխամտածված սպանության մեջ: Այսօր ավելի վաղ հաղորդվում էր, որ Բրեյվիկը ևս մեկ բժշկական փորձաքննության կենթարկվի:
