Իսպանական Iberia ավիաընկերությունը օդաչուների արհմիության գործադուլի պատճառով չեղյալ է համարել ապրիլի 20-ին նախատեսված ավելի քան 120 չվերթ: Այս մասին ասվում է ավիափոխադրողի տարածած հաղորդագրության մեջ:
Ինչպես հաղորդում է Eueronews-ը, հետաձգված 122 չվերթներից 58-ը ներքին են, մյուսները՝ միջազգային:
Ավիաընկերության կայքում ուղետոմսեր ձեռք բերած ուղևորները SMS-ծանուցումներ կստանան, եթե նրանց չվերթը հետաձգվի, նրանց կառաջարկվի այլընտրանքային տարբերակ: Տուր-գործակալությունների միջոցով տոմսեր գնած ուղևորները պետք է դիմեն այդ գործակալություններին՝ իրենց գումարները հետ ստանալու համար: Ավիաընկերությունը պարբերաբար իր հաճախորդներին տեղեկացնում է կատարվող զարգացումներին զանգերի կենտրոնների, Facebook և Twitter սոցիալական ցանցերի միջոցով:
Iberia-ի օդաչուների՝ թվով 17-րդ գործադուլի պատճառը ավիաընկերության հետ Իսպանիայի աշխատանքի նախարարության միջնորդությամբ անցկացվող բանակցությունների տապալումն է և նոր բյուջետային ավիաընկեության՝ Iberia Express-ի գործունեությունը: Այդ ընթացքում Iberia-ի ղեկավարությունն արդեն աշխատանքից հեռացրել է 8 օդաչուների՝ աշխատանքային պայմանագիրը խախտելու համար:
Օդաչուների արհմիությունը հայտարարել է, որ իր իրավունքները կպաշտպանի դատարանում: Iberia Express-ը, որն ամբողջությամբ պատկանում է Iberia-ին, մարտի 25-ից սկսել է չվերթներ իրականացնել մոտ և հեռու տարածությունների վրա, ինչը, ղեկավարության կարծիքով, ճգնաժամի պայմաններում հնարավորություն կտա տարեկան տնտեսել մինչև 100 մլն եվրո և հաջողությամբ մրցակցել եվրոպական շուկայի ավիափոխադրողների հետ: Մյուս կողմից, Iberia-ի օդաչուների արհմիության կարծիքով՝ նման բացատրությունը չի համապատասխանում իրականությանը, և նոր ընկերության ստեղծումը կհանգեցնի աշխատավարձերի և աշխատատեղերի կրճատման: