Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը՝ դատավոր Մխիթար Պապոյանի նախագահությամբ, երեկ ևս հետաձգել է 2010թ.-ի հունվարի 10-ին «Մոսկվա» կինոթատրոնում գողություն կատարելու մեղադրանքով ձերբակալված Ստեփան Հովակիմյանի և Վահրամ Քերոբյանի գործով դատական նիստը:
Վահրամ Քերոբյանը նախորդ նիստին հրաժարվել էր իր նախկին պաշտպան Գիվի Հովհաննիսյանից: Իսկ երեկվա նիստին Քերոբյանի նոր պաշտպանը` Երվանդ Վարոսյանը, հանդես եկավ միջնորդությամբ: Վերջինս դատարանին միջնորդել է ժամանակ տրամադրել իրեն` գործի նյութերին ծանոթանալու:
Հիշեցնենք, որ Ստեփան Հովակիմյանը մեղադրվում է իր ընկերոջ` Վահրամ Քերոբյանի հետ միասին «Մոսկվա» կինոթատրոնում 2010թ. հունվարի 10-ին կատարված գողությունը կազմակերպելու ու իրականացնելու մեջ` ՀՀ քր.օր.-ի 38-րդ հոդվածի 3-րդ մասով և 177-րդ հոդվածի 3-րդ մասի 1-ին կետով: Քր.գործը դատաքննվում է Կենտրոն և Նորք-Մարաշ վարչական շրջանների առաջին ատյանի դատարանում: Դատավարությունը մինչև ս.թ. հունվարի 11-ը վարում էր դատավոր Արմեն Խաչատրյանը, այժմ գործի վարույթը հանձնվել է դատավոր Մխիթար Պապոյանին:
Ըստ մեղադրանքի` գողացվել է 5 մլն 80 հազար դրամ և 10 հազար ռուսական ռուբլի: 32-ամյա Ստեփան Հովակիմյանն ու 28-ամյա Վահրամ Քերոբյանն արդեն 2 տարի է` պահվում են «Նուբարաշեն» քրեակատարողական հիմնարկում, սակայն մինչ օրս որևէ վարույթ չի հարուցվել ձերբակալման առաջին օրերին Ստեփան Հովակիմյանի նկատմամբ խոշտանգումներ իրականացնելու մասին վերջինիս հայտարարությունների վերաբերյալ:
Ստեփան Հովակիմյանի և Վահրամ Քերոբյանի գործի վարույթի երկարաձգման և իրավապահ մարմինների ներկայացուցիչների կողմից Ստեփան Հովակիմյանի նկատմամբ խոշտանգումների իրականացման կասկածանքի առնչությամբ Մարդու իրավունքների միջազգային կազմակերպության և «Քաղաքացիական հասարակության ինստիտուտ» հասարակական կազմակերպության կողմից Մարդու իրավունքների եվրոպական դատարան հայց է ներկայացվելու:
Հաջորդ դատական նիստը տեղի կունենա մայիսի 8-ին՝ ժամը 14:00-ին:
