Մարտի 13-ից մեկնարկել է Չարենցի 115-ամյակին նվիրված միջոցառումների շարքը: Այս թեմային անդրադարձան Չարենցի տուն-թանգարանի տնօրեն Լիլիթ Հակոբյանը և քաղաքապետարանի հանրակրթության վարչության պետի տեղակալ Սիլվա Աչոյանը:
Լիլիթ Հակոբյանը մինչ ելույթ ունենալը` նշեց, որ շատ կարևոր ձեռքբերում էր իրենց համար Չարենցի անձնական շախմատը, որը տուն-թանգարանին է նվիրել ՀՀ նախագահ Սերժ Սարգսյանը:
«Միջոցառումների շրջանակներում Երևանի 38 դպրոցներում կազմակերպվել են Չարենցյան դասեր: Մենք շեշտը դրել ենք ոչ թե Չարենց բանաստեղծի, այլ Չարենց հայրենասերի վրա: Աշակերտները շատ ակտիվ էին դասերին: Դրանք անցկացվել են 4-րդ դասարանից մինչև ավագ դպրոց»:
Հակոբյանը ընդգծեց, որ սա ընդամենը առաջին փուլն էր, պատրաստվում են քաղաքապետարանի հետ սեպտեմբերից իրականացնել երկրորդ փուլը, որը նախատեսվում է անցկացնել ոչ միայն Երևանում, այլև մարզերում և Արցախում, որպեսզի այնտեղի երիտասարդները ևս կարողանան մասնակցել Չարենցյան օրերին:
Սիլվա Աչոյանը, խոսելով թեմայի մասին, ասաց, որ միջոցառումների ծրագիրը ուղարկվում է բոլոր դպրոցներին. խնդիրն այն է, որ տվյալ դպրոցը իր տարածքում դառնա մշակութային օջախ: Այս ծրագրերի հիմքում միայն հոբելյանական միջոցառումները չեն: Այս միջոցառումների նպատակն է երեխաներին հաղորդակից դարձնել ազգային արժեքներին:
Աչոյանը հավելեց նաև, որ իրենց նպատակը միջպետական կառույց ստեղծելն է. բոլոր դպրոցները` Արցախում, Սփյուռքում, Վրաստանում, որոնք կրում են Չարենցի անունը, պետք է ներկայացնեն իրենց գործունեությունը, իսկ վերջում արտասանեն «Ես իմ անուշ Հայաստանի»-ն:
«Փորձում ենք առաջին անգամ օտար լեզվով հրատարակել Չարենցի ստեղծագործությունները` թարգմանիչը Սամվել Մկրտչյանն է, նպատակ ունենք թարգմանել «Ես իմ անուշ Հայաստանի»-ն առանձին գրքով` աշխարհի բոլոր լեզուներով: 30 երկրներից արդեն ունենք պատասխաններ: Կան մի քանի երկրներ, որտեղից մի քանի օրինակ թարգմանություն է ուղարկվել: Պետք է ստեղծվի հատուկ հանձնախումբ, որն ընտրելու է լավագույն թարգմանությունը»,- ասաց Հակոբյանը:
Միջոցառումները կավարտվեն համերգով, որը կկայանա «Արամ Խաչատրյան» համերգասրահում: Համերգի հիմքում ոչ միայն Չարենցի ստեղծագործություններն են, այլ նաև այն ստեղծագործությունները, որոնք սիրել է Չարենցը:
