Միայնա՞կ ես գնում ԱԺ, թե՞ քաղաքական որևէ ուժի սատարմամբ, դու գնում ես այնտեղ քաղաքական գործունեությա՞մբ զբաղվելու. Քաղաքական և միջազգային հետազոտությունների հայկական կենտրոնի՝ այսօր կազմակերպված քաղաքական բանավեճի ժամանակ այս հարցադրումով հանդես եկավ թիվ 12 ընտրատարածքում մեծամասնական ընտրակարգով պատգամավորության թեկնածու առաջադրված, «Չորրորդ ինքնիշխանություն» թերթի լրագրող Գոհար Վեզիրյանը:
«Հարցին՝ ի՞նչ լծակներ եմ կիրառելու խորհրդարանում այս կամ այն օրենքն անցկացնելու համար, ասում եմ` անկուսակցական պատգամավորը առավել լայն գործունեության դաշտ ունի: Քաղաքացիներն անկուսակցական պատգամավորին ընդունում են որպես իրենցից մեկը և վստահում նրան: Այս առումով ես բավական շահեկան վիճակում եմ»,- ասաց նա:
Գոհար Վեզիրյանի խոսքով` ինքը թիվ 12 ընտրատարածքը ներառող Շենգավիթ ու Էրեբունի համայնքների զարգացման առանձին ծրագիր է մշակել:
«Օրինակ` հանդես եմ գալու սովորական խուլիգանության ապաքրեականացման օգտին, քանի որ հենց այս համայնքներում են խուլիգանության համար ամենաշատ թվով դատապարտումները գրանցվում»,- ասաց պատգամավորության թեկնածուն:
Նշենք, որ թիվ 12 ընտրատարածքում առաջադրված մյուս թեկնածուները՝ ԲՀԿ-ական Լյովա Խաչատրյանը, ՕԵԿ-ական Ռոբերտ Մասումյանը, ՀՅԴ անդամ Կառլեն Գևորգյանը և ՀԱԿ ներկայացուցիչ Տիգրան Տեր-Պետրոսյանը բանավեճին չէին ներկայացել:
