Իշխանության ճնշումները ժողովրդի շրջանում հակազդեցություն են առաջացնում. այսօր լրագրողների հետ հանդիպման ժամանակ նման տեսակետ հայտնեց ՀՀՇ վարչության նախագահ, թիվ 4 ընտրատարածքում առաջադրված պատգամավորության թեկնածու Արամ Մանուկյանը:
Նա տեղեկացրեց, որ իրենք քարոզարշավ են անցկացրել հինգ շրջանում` յուրաքանչյուրում ունենալով չորսից հինգ հանդիպում: Բանախոսի որակմամբ` քարոզարշավը հիմնականում լավ է անցել, չհաշված իշխանության ցուցաբերած բռի մեթոդները Էջմիածնում և Արտաշատում:
Ըստ նրա` ժողովրդին ահաբեկում են, զրկում էլեկտրականությունից, ոստիկանները բացահայտ նկարահանում են ժողովրդին` այդպիսով փորձելով ահաբեկել:
«Էջմիածնի գեներալները դուրս են եկել սեփական ժողովրդի դեմ: Հիմա եմ հասկանում, թե այդ ուժը որտեղ է. երբ հանդիպում ես ժողովրդի հետ, զգում ես, որ դա միայն զայրույթ է առաջացրել, հակադարձումն ավելի մեծ է:
Արմավիրում Մերուժան Մխոյանի թեկնածությունը հանելը վրդովեցրել է ժողովրդին, և բոլորը իշխանությունների դեմ են տրամադրված: Այդպիսի գռեհիկ քայլերը հակառակ ազդեցությունն են թողնում: Զոյա Թադևոսյանի և Բաբկեն Գարոյանի նկատմամբ բռնությունը նույնպես զայրացրել է ժողովրդին: Այդ ամենը զգում եմ տնետուն այցելելիս: Ինձ համար հաճելի է տեսնել խոհանոցային ընդդիմությանը` ուրիշ թվեր են, ուրիշ տպավորություններ:
Ժողովրդի 70-80%-ը համակիր է ՀԱԿ-ին: Նրանց մի մասը այդ մոտեցումը գործողության չի վերածի: Ժողովրդի շրջանում հանդիպել եմ նաև ԲՀԿ կողմնակիցների, սակայն չեմ հանդիպել ոչ ՀՅԴ, ոչ ՀՀԿ, ոչ ՕԵԿ կողմնակիցների: «Ժառանգություն»-ը ևս ունի աջակիցներ»,- նշեց Արամ Մանուկյանը` հավելելով, որ մի-երկու տեղ հանդիպել են պաշտոնյաների, որոնք խնդրել են չհարցնել, թե ում կողմնակիցներն են:
Արամ Մանուկյանն ասաց, որ Ս. Սարգսյանը ՕԵԿ-ին «քցելու» է: «ՕԵԿ-ին տանելով ԱԺ ` ոչ մի խնդիր չի լուծելու. Արթուրին կարելի է պաշտոն տալ և վերջ: ՀՅԴ-ն և «Ժառանգություն»-ը կանցնեն խորհրդարան»,- կանխատեսեց Արամ Մանուկյանը:
