Համագործակցությունների մասին խոսելը վաղ է: Այսօր «Առաջին լրատվական»-ի հետ զրույցում ասաց ԱԺ Դաշնակցություն խմբակցության պատգամավոր Ռուզան Առաքելյանը:
Հարցին՝ պատկերացնո՞ւմ է արդյոք նոր գումարման խորհրդարանում ԲՀԿ, ՀԱԿ, ՀՅԴ և «Ժառանգություն» ուժերի միջև համագործակցություն, դաշնակցական պատգամավորը պատասխանեց, որ այս նախընտրական շրջանում որևէ հստակություն չկա, այսինքն` սկզբունքներ պետք է լինեն, որ դրանով քաղաքական ուժերը իրար կողք կանգնեն, պետք է մարտահրավերներ լինեն, ազգային խնդիրներ լինեն, հիմա ոչ մի քաղաքական ուժի քարոզարշավից ոչ մի բան հասկանալի չէ, այսինքն` մարդիկ միայն քարոզարշավային փուլում են, իրենց նախընտրական ծրագրերն են ներկայացնում:
«Դաշնակցության համար միշտ մեկ բան է միանշանակ, որ համագործակցության եզրեր կարող են լինել, եթե ազգային խնդիրներ են առաջադրված, և որևէ քաղաքական ուժ ցանկություն ունի կանգնել Դաշնակցության կողքին, մնացած բոլոր դեպքերում Դաշնակցությունը միայնակ է պայքարում»,- մեկնաբանեց Ռուզան Առաքելյանը:
