ՆԱՏՕ-ն չի պատրաստվում խառնվել Սիրիայի հակամարտությանը, և մինչ օրս դաշինքը Թուրքիայի կողմից խորհրդատվության դիմում չի ստացել։ Այս մասին հաղորդում է Rosbalt.ru-ն:
«Իհարկե, իրադրությունը Սիրիայում մեզ համար լուրջ անհանգստության տեղիք է տալիս: Մենք քննադատում ենք զինված հարձակումները քաղաքացիական հասարակության վրա և քաղաքներում արյունահեղությունները: Թուրքիան Սիրիայի հարևանն է, այդ իսկ պատճառով անհանգստացած է սիրիական իրադարձություններով»,-հայտարարել է ՆԱՏՕ-ի գլխավոր քարտուղար Անդերս Ֆոգ Ռասմուսենը:
Նա նշել է, որ Թուրքիան, որպես ՆԱՏՕ-ի անդամ, իրավունք ունի խորհրդատվության խնդրանքով դիմել դաշինքին, եթե իր անվտանգությանն ուղղված սպառնալիք է տեսնում: «Մենք պատրաստ ենք խորհրդատվություն տալ այդ հարցով առաջին իսկ դիմումի պարագայում: Մինչ այժմ որևէ դիմում դաշինքի անդամ երկրներից չի ստացվել, սակայն մենք ուշադիր հետևում ենք իրադարձություննեին »,- ընդգծել է Ռասմուսենը:
Հիշեցնենք, որ ապրիլի 12-ին Թուրքիայի վարչապետ Թայիփ Էրդողանը չէր բացառել, որ Անկարան կարող է դիմել ՆԱՏՕ-ի օգնությանը, եթե Սիրիան խախտի իր սահմանները: Թուրքիայի վարչապետը նշել էր, որ Անկարան «բազում տարբերակներ ունի», որոնցից մեկը ՆԱՏՕ-ի 5-րդ հոդվածի կիրառումն է (նախատեսում է օգնություն ցուցաբերել ՆԱՏՕ-ի դաշնակցին, որը ենթարկվում է ագրեսիայի):
Հավելենք, որ վարչապետ Էրդողանը Սիրիային «ողջամտության» կոչ է արել: Նրա կարծիքով՝ հարևան Սիրիայում հակամարտության կարգավորումը պետք է ապահովի ՄԱԿ ԱԽ-ն:
Ապրիլի 11-ին սիրիական զինվորականները գնդակոծել էին Թուրքիայում գտնվող փախստականների ճամբարները:
