Աֆղանստանում ամերիկյան զինծառայողները լուսանկարվել են աֆղանական գրոհայինների դիերի հետ: Այդ լուսանկարներն ապրիլի 18-ին հրապարակել է Los Angeles Times-ը: Լուսանկարներն արվել են 2010 թվականին:
2010 թ. փետրվարին զինծառայողներին ուղարկել են ծայրամասային Զաբուլ` մահապարտի մատնահետքերը վերցնելու և նրա աչքի ծիածանաթաղանթը նկարելու համար, ինչն անհրաժեշտ էր դին ճանաչելու համար: Զինվորները լուսանկարվել են մահապարտի կտրված ոտքերի հետ:
Մի քանի ամիս անց այդ նույն ստորաբաժանումն ուղարկվել է երեք գրոհայինների մարմիններ ուսումնասիրելու: Ամերիկացները լուսանկարվել են նաև այդ դիակների հետ:
Լուսանկարները թերթին փոխանցել է այդ զինվորների ծառայակիցը: Այն բանից հետո, երբ լրագրողները լուսանկարները ցույց են տվել զինվորական հրամանատարության ներկայացուցիչներին, սկսվել է հետաքննություն: Լուսանկարներում բոլորից շատ կեցվածք ընդունած զինծառայողի անձն արդեն պարզվել է:
ԱՄՆ պաշտպանության նախարար Լեոն Պանետտան քննադատել է ամերիկյան զինծառայողների գործողությունները: Այդ մասին հաղորդում է Agence France-Presse-ը: Միաժամանակ նա ափսոսանք է հայտնել, որ Los Angeles Times–ը հրապարակել է այդ լուսանկարները` չնայած Պենտագոնի չհրապարակելու խնդրանքին: Պանետտան, ինչպես հստակեցրել է նրա մամլո քարտուղարը, անհանգստանում է, որ լուսանկարները կարող են օգտագործվել հակաամերիկյան ելույթներ սադրելու նպատակով:
